Kryeministri Edi Rama tha sot se ashti sikundër kishte informuar edhe më parë, iniciativën për shërbimin e specializuar mjekësor të djalit të lënduar në protestë në Itali nuk e kanë marrë “persona” po e ka marrë ai personalisht.

Duke iu përgjigjur një postimi të motrës së 28-vjeçarit nga Elbasani dhe ripostimeve nga persona politikë e jopolitikë, Rama saktësoi se edhe vajtja e tij në Romë me avion mjekësor, si edhe mbulimi i shpenzimeve janë mundësuar pikërisht nga shteti dhe nga askush tjetër.

“Motra e djalit nga Elbasani paska postuar tekstin bashkëngjitur, prandaj me shumë keqardhje më duhet t’i rikthehem kësaj teme për këdo që e lexon, shpërndan apo publikon postimin e saj”, nisi reagimin kryeministri.

Rama shtoi se i ka ka uruar të shkuara djalit nga Elbasani përpara se sa të nisej për kurim në Itali.

“I kam uruar të shkuara përpara se sa të nisej bashkë me të vëllanë nga salla VIP e aeroportit, prej ku nisem për jashtë edhe unë vetë, Presidenti i Republikës apo Kryetari i Kuvendit”, tha Rama.

Kreu i qeverisë u shpreh se nuk e ka bërë për protagonizëm.

“Aspak për protagonizëm, sepse protagonizmin këto ditë e kanë të gjithin dhunuesit dhe nxitësit e tyre, po për humanizëm, sepse kur pushon marrëzia e gurëve e molotovëve, edhe dhunuesit e lënduar janë qytetarë të këtij vendi që duhen ndihmuar, mjekuar, shëruar”, tha Rama.

Marrë nga ATSH