Dita e Ujit të Bekuar është kremtuar sot nga besimtarët ortodoksë anembanë vendit, por me kufizime në qytetet ku reshjet e shiut kanë qenë të shumta.

Kryepeshkopi Joan bëri sot bekimin e ujit dhe popullit shpresëtar në Kishën e Apostull Pavlit dhe Shën Astit, në qytetin e Durrësit. Rituali i hedhjes së kryqit u anulua në Durrës, por edhe në Gjirokastër, për shkak të situatës problematike nga moti i keq.

Dita e Ujit të Bekuar në Korçë mblodhi besimtarët sipas traditës, me besim e përulësi shpirtërore. Ata kanë marrë ujin e shenjtë, duke ruajtur një zakon shekullor me shpresën për paqe, shëndet dhe mbarësi gjatë vitit. Hedhja e kryqit u bë në shatërvanin e qytetit.

Besimtarët ortodoksë të Fierit u mblodhën në Kishën e Shën Gjergjit për të festuar Ditën e Ujit të Bekuar. Liturgjia e mëngjesit, u drejtua nga Hirësia e Tij Nikolla, mitropoliti i Mitropolisë së Apolonisë.

Ndërkohë, besimtarët në Berat sfiduan kushtet e vështira atmosferike. Tetë djem të rinj u hodhën në lumin Osum. Kryqi u hodh nga mitropoliti, imzot Asti i ndjekur nga qindra qytetarë.

Besimtarët ortodoksë të Himarës u bashkuan për të kremtuar Ditën e Shenjtë të Ujit të Bekuar. Në një atmosferë përkushtimi dhe bashkimi, hedhja e kryqit u bë në bregdetin e Himarës, pranë shëtitores së qytetit.

Kjo ditë e shenjtë u shënua gjithashtu edhe në fshatin Qeparo, ku pas mbajtjes së meshës, kryqi u hodh në det dhe u kap nga Vasil Jovani, duke vijuar traditën shekullore të komunitetit ortodoks.

Në Përmet hedhja e kryqit u bë në lumin Vjosë. Besimtarët u mblodhën për të marrë ujin e shenjtë, duke ruajtur një traditë që na lidh me shpresën për paqe, shëndet dhe mbarësi gjatë vitit.

Uji i Bekuar simbolizon pastrimin, ripërtëritjen dhe bekimin për besimtarët dhe mjediset ku ata jetojnë e punojnë. Ky ujë është një nga dhuratat më të bukura të Zotit për t’i dhënë një pjesë të shenjtë jetës së përditshme dhe për të larguar të keqen nga gjërat që na rrethojnë.