Fotografi Italian Massimo Saretta prezantoi në Tiranë albumin “Asia”, veprën e tij të re që është një projekt editorial me përmasa të gjera.

“Asia” vjen me 250 faqe imazhesh që rrëfejnë historinë, artin, kulturën dhe besimet e Orientit, një itinerar vizual intensiv, i aftë të kapë thelbin e vendeve më të largëta dhe të nxisë njohjen, ndjeshmërinë dhe reflektimin mbi “të ndryshmen”.

Promovimi në Tiranë, u bë i mundur edhe falë mbështetjes së Institutit Italian të Kulturës dhe Universitetit “Aleksandër Moisiu”, që sollën jo vetëm një libër, por një thesar kulturor.

Projekti merr formë falë kontributit të organizatës Resolution, nën drejtimin e art manager Liora Sinigaglia, me mbështetjen e dr. Armela Curi dhe fotografit Grisel Hoxha, të cilët kanë shoqëruar ndërtimin e një rruge kulturore koherente dhe vizionare.

Qëllimi i projektit është promovimi i njohjes së kulturave dhe qytetërimeve që popullojnë territoret aziatike, një objektiv që talenti i Saretta-s arrin ta realizojë duke kapur thelbin e tyre më të thellë.

Udhëtimi fotografik përmbledh shkrepje dhe përvoja të mbledhura gjatë një harku prej njëzet vitesh: nga India në Kamboxhia, nga Kina në Vietnam, nga Bangladeshi në Nepal, duke përfshirë gjithashtu Japoninë dhe Tajlandën. Imazhet, të karakterizuara nga ngjyra të forta dhe kontraste të theksuara, i përcjellin shikuesit larminë dhe autenticitetin.

Marrë nga ATSH