Prokuroria e Posaçme kundër Korrupsionit dhe Krimit të Organizuar njoftoi sot se po heton për veprën penale “Shkelje e barazisë së pjesëmarrësve në tendera apo ankande publike”, zëvendëskryeministren, njëherësh ministre për Infrastrukturën dhe Energjisë, Belinda Ballukun.

SPAK bëri të ditur se në kuadër të hetimit sot i është njoftuar akuza Belinda Ballukut me funksionin e lartë shtetëror, ministër i Ministrisë së Infrastrukturës dhe Energjisë, akuzuar për kryerjen e veprës penale, “Shkelje e barazisë së pjesëmarrësve në tendera apo ankande publike”, në bashkëpunim”.

Sipas SPAK, deri në këtë fazë të hetimeve paraprake, faktet penale kanë të bëjnë me veprimet e saj, në cilësinë e ministrit të Ministrisë së Infrastrukturës dhe Energjisë, për njërën nga procedurat e prokurimit, objekt i këtij hetimi, “Ndërtimi i tunelit të Llogorasë”, në seksionin rrugor Orikum-Himarë, pjesë e autostradës SH8 (Vlorë-Sarandë), zhvilluar në datën 11.12.2020 dhe pas anulimit të saj, procedura është rihapur në datën 22.6.2021, me fond limit, 18 967 810 952.08 (tetëmbëdhjetë miliardë e nëntëqind e gjashtëdhjetë e shtatë milionë e tetëqind e dhjetë mijë e nëntëqind e pesëdhjetë e dy (pikë) zero tetë) lekë pa TVSH.

SPAK po ashtu sqaron se më 21 tetor si organ procedues ka njoftuar Ballukun përmes shkresës me numër protokolli 37398.

Prokurorisë së Posaçme sqaroi më tej se Balluku ka njoftuar më 23 tetor organin procedues se nuk mund të paraqitej në datën dhe orën e caktuar.

Me anë të një shkrese tjetër, me numër protokolli 37881, datë 24.10.2025, Prokuroria e Posaçme kërkoi paraqitjen e saj sot, më 31 tetor, në orën 15:00, njoftoi SPAK.

Zv.kryeministrja Balluku u paraqit sot në ambientet e Strukturës së Posaçme Kundër Korrupsionit dhe Krimit të Organizuar. (SPAK). “Si qytetare e Republikës së Shqipërisë dhe zyrtare publike e shikoj këtë si një proces, një proces i cili jam shpresëplotë që do të jetë i bazuar mbi transparencë dhe mbi parimet e drejtësisë tek e cila besoj”, deklaroi Balluku për mediet.

Burimi ATSH