Në përfundim të mbledhjes së grupit parlamentar të Partisë Socialiste, kreu i këtij grupi, Taulant Balla njoftoi se pritet që të dorëzohen amendamentet për ligjin mbi barazinë gjinore.

Në një prononcim për mediet, Balla tha se ky ligj është i mirë në thelb, por kërkon saktësime të disa termave.

Pyetjes nëse ka reflektuar mazhoranca për një nismë për ligjin për barazinë gjinore, Balla iu përgjigj se “kemi pasur një diskutim dhe në mbledhjen e kaluar dhe në mbledhjen e sotme të grupit më në fund pas një pune intensive. Dhe të parën që dua të falënderoj është ministrja e Shëndetësisë dhe Mbrojtjes Sociale, Evis Sala, e cila edhe pse prej pak javësh në detyrë ka treguar një lidership dhe një gatishmëri për të diskutuar me deputetët sipas asaj që përcakton Kushtetuta”.

“Dua të informoj sot se ligji është një ligj i mirë, por që ka nevojë për disa saktësime më shumë termash le të themi dhe terminologjie në tërësi. Grupi Parlamentar i Partisë Socialiste njofton se do të depozitojë sot ose nesër sepse janë duke punuar ekspertët tanë pasi kanë marrë dhe informacionin e domosdoshëm në rrugë zyrtare nga ministrja dhe përmes ministrit për marrëdhëniet me Parlamentin do të depozitojë amendamentet për saktësimin e këtyre termave”, theksoi Balla.

/Burimi ATSH