Presidenti i Republikës, Bajram Begaj niset sot për një vizitë zyrtare në Hungari me ftesë të Presidentit hungarez, Tamás Sulyok.

Zyra e shtypit pranë Presidencës bëri të ditur se kjo vizitë synon të forcojë më tej dialogun politik, marrëdhëniet dypalëshe bazuar në një miqësi historike, bashkëpunim për finalizimin e procesit të anëtarësimit të Shqipërisë në BE, bashkëpunim për situatën e sigurisë në rajon dhe në Evropë si dy vende në NATO.

Agjenda e Presidentit Begaj dhe e delegacionit që e shoqëron parashikon takime të veçanta me Presidentin Sulyok, me Kryeministrit Viktor Orban, si dhe me Kryetarin e Asamblesë Kombëtare Hungareze, László Kövér.

Pjesë e agjendës së kësaj vizite është edhe takimi me përfaqësues të komunitetit shqiptar që jeton në Hungari.

Marrëdhëniet diplomatike mes Shqipërisë dhe Hungarisë janë vendosur më 23 maj 1922.

Dialogu politik konsiderohet si një nga shtyllat kryesore të marrëdhënieve dypalëshe.

Hungaria ka përdorur të gjitha mundësitë për të shprehur mbështetjen për integrimin evropian të Shqipërisë dhe ka ofruar mbështetje konkrete me ekspertizë në kuadrin e programeve të binjakëzimit dhe të Fondit të Ballkanit Perëndimor.