Mbi 86 mijë fëmijë kanë përfituar nga programi kombëtar i depistimit të shikimit në shkolla.

Ministrja e Shëndetësisë dhe Mbrojtjes Sociale, Albana Koçiu bëri sot publike shifrat e rezultateve, pas integrimit të këtij programi në shkollat e vendit, duke evidentuar se 9815 nxënës janë referuar për vizitë tek mjeku specialist për ndjekjen e problematikave të shfaqura.

Ministrja Koçiu u shpreh se “gjatë vitit shkollor 2024–2025, 86,007 nxënës u përfshinë në Programin Kombëtar të depistimit të shikimit në shkolla”, tha Koçiu në postimin në rrjetet sociale.

“Edhe gjatë këtij viti të ri mësimor, do të vijojmë të ofrojmë kontrolle të rregullta e ndërhyrje të hershme, me fokus tek shëndeti i fëmijëve”, tha Koçiu.

Qeveria miratoi në prill të 2022-shit Programin Kombëtar për Kujdesin e Shikimit për Fëmijët, një program që garanton kujdesin në shikimit për fëmijët, që tek të porsalindurit, deri tek fëmijët në moshën 14-vjeçare.

Përmes këtij programi sigurohet vlerësimi okulistik/optometrik bazuar në protokollet e miratuara nga MSHMS dhe përgatitja e një regjistri kombëtar për problemet e shikimit të fëmijëve.

Nëpërmjet këtij program synohet që të kapen në kohë të gjithë problematikat e shikimit të fëmijëve, duke mundësuar në kohë të hershme elementët e tjerë që kanë të bëjnë me korrektimin e shpejtë të syve dhe problematikave të thella të shikimit, që çojnë deri në verbëri.

Ky program ka fokus parandalimin dhe edukimin duke ofruar shërbime të reja socio-shëndetësore në strukturat e arsimit.

Burimi ATSH