Fëmijët e Shtëpisë së Fëmijës “Zyber Hallulli” kaluan një javë të paharrueshme në kampin veror në Ecopark Dumrea, në Belsh, Elbasan, ndërsa kishin edhe praninë e dy gjysheve.

Ministrja e Shëndetësisë dhe Mbrojtjes Sociale Albana Koçiu nëpërmjet një postimi në rrjetet sociale, bëri të ditur se ka nisur zbatimi i projektit më të ri “Gjyshet për fëmijët”.

“Zhuljetën e takova në kampin e fëmijëve dhe më la mbresa me dashurinë, urtësinë dhe përkujdesjen e saj. Si pjesë e projektit “Gjyshet për fëmijët”, ajo viziton shpesh fëmijët e “Zyber Hallulli”-t, duke u bërë për ta një gjyshe e vërtetë, me këshilla, ngrohtësi dhe mbështetje, ashtu si vetëm gjyshet dinë të japin”, shkruan ministrja.

Vetë gjyshe Zhuljeta u shpreh se në fokus të projektit është që të ndërtojmë për fëmijët atë realitet që atyre u mungon.

“Ishte rastësi që unë të njoh Valbonën. Më tha të vija të prezantoja librat e mi, duke qenë mësimdhënëse e kam shumë afër shkrimin tim me botën e fëmijëve. Dy takime që kisha bërë me ata dhe përqafimi që ndjetë sot, më bëri ta ndjej botën pjesë të tyre. Projekti “Gjyshët për Fëmijët” në kuptimin që familja ka nevojë për të gjitha dashuritë dhe të ofronim intimitetin e gjyshes. Si do të më thonin “nënë” dhe tani më thërrasin të gjithë “nëna”, “nëna”. Ne jemi këtu për të ndërtuar atë realitet që atyre u mungon!”, u shpreh Zhuljeta.

Gjyshe Zhuljeta tha më tej se “ne që jemi në pension mund të japim diçka me eksperiencën tonë edhe si prind edhe si edukator, por edhe shoqëria të jetë e interesuar, të gjitha shtresat e shoqërisë për të bashkëvepruar që shoqëria të jetë e saktë”.

Programi ka për qëllim të sjellë në jetën e fëmijëve që rriten në institucionet e përkujdesit social, figurën e ngrohtë, të përkushtuar dhe mbështetëse të gjyshes.

Ky program jo vetëm që kontribuon në mirëqenien dhe zhvillimin e fëmijëve, por krijon gjithashtu mundësi të vlefshme për angazhimin aktiv të gjysheve në jetën shoqërore, duke nxitur përmbushjen personale dhe përmirësimin e shëndetit mendor të tyre.

Burimi ATSH