Këshilli i Ministrave miratoi sot një vendim që përcakton rregullat, procedurat dhe kohëzgjatjen e mbrojtjes personale dhe banesës së personaliteteve të tjera pas përfundimit të detyrës.

Sipas këtij vendimi, Garda e Republikës së Shqipërisë ruan e mbron, pas përfundimit të detyrës, personalitetet apo banesën e tyre, kur u rrezikohet jeta, shëndeti apo familja, për shkak të detyrës që kanë kryer.

Kushtet për të përfituar ruajtjen fizike dhe mbrojtjen e banesës janë: prania e rrethanave serioze, që rrezikojnë jetën, shëndetin apo familjen e personalitetit apo banesën e tij, brenda gjashtë muajve nga përfundimi i detyrës; prania e lidhjes shkakësore ndërmjet rrethanave serioze dhe ushtrimit të funksionit të mëparshëm nga personaliteti.

Në vendim thuhet se, kërkesa për mbrojtje i paraqitet me shkrim ministrit të Brendshëm nga vetë personaliteti i rrezikuar.

Kërkesa për mbrojtje përmban: gjenealitetet e plota të kërkuesit; një përmbledhje të fakteve dhe të rrethanave, që përbëjnë rrezik serioz për personalitetin apo banesën e tij, të cilat e detyrojnë të kërkojë mbrojtje edhe pas përfundimit të detyrës.

Ministri i Brendshëm urdhëron menjëherë, por jo më vonë se 24 orë, mbledhjen e Komisionit të Posaçëm për të bërë vlerësimin e kërkesës.

Komisioni i Posaçëm vlerëson kërkesën e paraqitur, si autoriteti vendimmarrës për mbrojtjen e veçantë.

Pas shqyrtimit të kërkesës për nevojën e mbrojtjes së personalitetit apo të banesës së tij, komisioni merr vendim brenda 48 orëve. Vendimi u njoftohet ministrit të Brendshëm dhe personalitetit të rrezikuar.

Komisioni, në procesin e shqyrtimit të kërkesës për mbrojtje, sipas këtij vendimi, mund të kërkojë informacione nga institucione të tjera.

Vendimi përmban nivelin e sigurisë dhe masat e mbrojtjes, numrin e truprojave apo të rojeve për banesën, afatin e mbrojtjes, si dhe masa të tjera, që lidhen me këtë mbrojtje.

Mbrojtja e personalitetit apo e banesës zgjat për aq kohë sa janë të pranishme rrethanat e rrezikut, por jo më shumë se një vit.

Me përfundimin e afatit maksimal të mbrojtjes, Komisioni i Posaçëm vendos për vijimin e mbrojtjes me të njëjtat masa; përfundimin e mbrojtjes; ndryshimin e masave të sigurisë.

Pas vendimit të komisionit, Garda e Republikës merr menjëherë në mbrojtje personalitetin apo banesën e rrezikuar, duke zbatuar masat e përcaktuara në vendim.

Komisioni i Posaçëm përbëhet nga: zëvendësministri i Brendshëm; zëvendësdrejtori i Përgjithshëm i Policisë së Shtetit; zëvendësdrejtori i Përgjithshëm i Gardës së Republikës; një përfaqësues i Prokurorisë së Posaçme Kundër Korrupsionit dhe Krimit të Organizuar; një përfaqësues i Byrosë Kombëtare të Hetimit; një përfaqësues nga Shërbimi Informativ i Shtetit, në nivel drejtor drejtorie; një përfaqësues nga Agjencia e Inteligjencës dhe Sigurisë së Mbrojtjes, në nivel drejtor drejtorie.

Kryetar i Komisionit të Posaçëm, është zëvendësministri i Brendshëm.

Pjesëmarrja në mbledhjet e komisionit është e detyrueshme. Mbledhjet e komisionit janë të vlefshme kur janë të pranishëm jo më pak se 5 anëtarë me të drejtë vote.

Vendimet e komisionit janë të vlefshme kur miratohen nga më shumë se gjysma e anëtarëve të pranishëm në mbledhje.

Kryetari i komisionit cakton një sekretariat teknik, i cili mbështet organizimin, funksionimin dhe mban procesverbalin e zhvillimit të mbledhjes.

Burimi ATSH