Ministrja e Turizmit dhe Mjedisit, Mirela Kumbaro prezantoi sot ne Kuvend projektligjin “Për ratifikimin e marrëveshjes sipas Konventës së Kombeve të Bashkuara për të drejtën e detit mbi ruajtjen dhe përdorimin e qëndrueshëm të diversitetit biologjik detar të zonave përtej juridiksionit kombëtar”.

Në fjalën e saj, Kumbaro tha se “Shqipëria e ka treguar mjaft qartë duke zhvilluar të vetmen industri atë të turizmit, si një industri që nuk ndot duke shkuar nga turizmi masiv drejt atij cilësor. Detet e hapura zënë një sipërfaqe prej 64% të vëllimit në oqeane duke përfshirë ekosisteme të pasura”.

“Marrëveshja përcakton qartë kornizën ligjore në raport me madhësinë e vendit në raport me vijat bregdetare që secili vend ka se është e nevojshme që përveç mbrojtjes së hapësirave tokësore të lumenjve e të pyjeve për çka Shqipëria sot ka mbi 21.5% të territorit zonë të mbrojtur duke siguruar në të njëjtën kohë edhe zhvillimin e qëndrueshëm, të shtojmë edhe sipërfaqen e mbrojtjes së parqeve detare që ne sot i kemi, të paktën duke shtuar edhe atë më të fundit, parkun detar të Porto Palermos”, nënvizoi Kumbaro.

Ministrja Kumbaro shpjegoi më tej se çfarë do të thotë konkretisht të bërit palë në këtë marrëveshje.

“Së pari ofron bashkëpunim të zgjeruar për të përmbushur zbrazëtitë ekzistuese në konventën për të drejtën e detit, krijimin dhe vazhdimin për mbrojtjen e zonave të tjera detare, vlerësimin e ndikimeve në mjedis përmes zbatimit të detyrimeve të përcaktuara në konventë për aktivitetet dhe ndikimin e tyre në mjedis, burimet gjenetike detare, parashikimet që detyrojnë shtetet mbi zgjedhjen e trajtimit të këtyre çështjeve”, tha Kumbaro.

Ministrja Kumbaro u shpreh se “ajo që përfiton drejtpërsëdrejti Shqipëria në kapacitetet e veta është ndërtimi dhe përmirësimi i kapaciteteve dhe transferimi i teknologjisë detare, që konsiston në dhënien e mbështetjes për përforcimin e angazhimeve”.

“Ne jemi në fazën kur kemi hapur dhe negociuar me sukses disa prej kapitujve të negociatave me BE-në një prej tyre është kapitulli 27, më i gjati, më i vështiri dhe më i kushtueshmi. Është një tjetër detyrim në plotësim e kushteve të kapitullit 27, një ndër sfidat më të mëdha në negociatave me BE-në që Shqipëria të bëhet palë e kësaj marrëveshjeje me miratimin e të cilës prezantohemi javën e ardhshme në organizmin më të madh botëror që ka të bëjë me mbrojtjen e zonave të mbrojtura detare dhe oqeanike në Francë”, tha Kumbaro.

Ministrja Kumbaro i bëri apel deputetëve të miratojnë këtë projektligj.

Burimi ATSH