Parku Arkeologjik Shkodër edhe këtë vit vijon të jetë një ndër destinacionet e preferuara për turistët nga vende të ndryshme të botës.

Kryeministri Edi Rama ndau në rrjetet sociale pamje nga vizita e turistëve në këtë monument të rëndësishëm në Shkodër.

“Parku Arkeologjik Shkodër mirëpret çdo ditë qindra vizitorë nga mbarë bota duke e çuar në 59,402 numrin total të vizitorëve nga janari në 31 maj”, shkruan Rama.

Në videon e publikuar nga Rama, turistë nga vende si Gjermania, Turqia, Kina, Izraeli por edhe shqiptarë të Kosovës flasin për përshtypjet e tyre për këtë park.

“Ne jemi nga Gjermania. Dhe jemi këtu për herë të parë. Është e mrekullueshme”, thotë një turist gjerman.

Parku Arkeologjik Shkodër është një destinacion ku historia dhe natyra krijojnë peizazhin perfekt. Kalaja, ajo që vazhdon të tërheqë më shumë vëmendjen e vizitorëve vendas e të huaj, është një nga më të bukurat në rajon, duke qenë se edhe pozicioni i saj strategjik ofron një fushëpamje mahnitëse.

Numri i vizitorëve në Kalanë e Rozafës, vitet e fundit ka qenë gjithnjë në rritje.

Burimi ATSH