Vet Hospital Tirana, spitali më i madh për kafshët në rajon, hapi mbrëmjen e sotme dyert në kryeqytet.

Spitali është një investim bashkëkohor që ofron kushte më të mira për të gjithë katërputroshët që kanë nevojë për veteriner.

Në përurimin e Vet Hospital Tirana, ishin të pranishëm kryeministri Edi Rama, ministri i Ekonomisë, Kulturës dhe Inovacionit, Blendi Gonxhja si dhe të ftuar të tjerë.

Ministri Gonxhja tha se, “kjo është një hapësirë moderne, e pajisur me teknologjinë më të avancuar, ku katërputroshët tanë do të mund të marrin gjithë përkujdesjen që meritojnë e me profesionalizëm të lartë”.

Gonxhja e cilësoi Vet Hospital Tirana, një investim të rëndësishëm që jo vetëm që ngre standardet e shërbimit veterinar në vend, por që do të jetë edhe një dritare për profesionistët e rinj që kanë vendosur t’i përkushtohen kujdesit ndaj kafshëve..

“Ky është një hap përpara për mirëqenien, por edhe për ekonominë”, u shpreh ministri Gonxhja.

Me një ekip profesionistësh të përkushtuar dhe kujdes 24/7, Vet Hospital Tirana është tashmë një strehë e sigurisë dhe shërbimit cilësor për kafshët shtëpiake, duke ofruar trajtim të specializuar dhe një mjedis miqësor me kafshët.

Spitali ofron një gamë të gjerë shërbimesh dhe ka në përdorim pajisje dhe teknologji të avancuara për diagnostikimin e shëndetit të kafshëve, ndërsa angazhon edhe profesionistë të huaj për ekspertizë më bashkëkohore në këtë fushë.

Burimi ATSH