Ministri i Ekonomisë, Kulturës dhe Inovacionit, Blendi Gonxhja tha sot se në ish-Kombinat në Tiranë do të ketë shumë shpejt një studim për të parë mundësinë se si mund të shërohet kjo zonë nga degradimi”.

Në një prononcim për mediet, pas nënshkrimit të marrëveshjes së bashkëpunimit me IFC që mbështet zhvillimin e Parqeve Eko-Industriale në Shqipëri, Gonxhja tha se “zonat si ajo e ish-kombinatit dhe e ish-njësive të prodhimit janë sot në gjendje shpesh të braktisur dhe të degraduar. Këto zona duhet të shikohen me urgjencë për t’u kthyer në qendra që të mund të përfshihen në ekonomi dhe industri rekreative apo në ekonominë e gjelbër”.

“Shumë shpejt do të ndërhymë për të zhvilluar zonat që duhet të përfshijnë gjithçka nga rekreacioni, tek zonat sociale, sportive, ekonomike, tregje të cilat do të ofronin mundësi për të rinjtë, për moshat e ndryshme dhe për të gjeneruar ekonomi, jetë sociale, kulturë, art”, tha Gonxhja.

Ne, tha Gonxhja, kemi një rol kryesor për të luajtur jo vetëm për ekonominë, por edhe për detyrimet që kemi për dekarbonizimin dhe ekonominë e gjelbër dhe për shërimin mjedisor të disa prej zonave si Kombinati që e vuajnë të shkuarën e këtyre industrive, të cilat nuk mund të mbeten sot mes qendrave urbane në gjendjen që janë.

“Ky projekt do të ndihmojë shumë për konceptimin e planeve, për shembull parkun e Metalurgjikut për zonën industriale, ku do të punojnë atje me zhvilluesit që aktualisht janë më të gjithë zhvilluesit si dhe për parqe të tjera ekzistuese me zhvillues publik e privat siç është edhe parku Xhafzotaj, si parku TEDA Tiranë me zhvillues bashkinë e Tiranës, që të gjitha parametrat dhe stabndardet e këtyre parqeve ekologjike të jenë sa më eko”, tha Gonxhja.

Burimi ATSH