Ministri i Ekonomisë, Kulturës dhe Inovacionit, Blendi Gonxhja zhvilloi sot një takim me ministren franceze të Inovacionit, Clara Chappaz, e cila ndodhet në Tiranë si pjesë e delegacionit të presidentit francez, Emmanuel Macron.

Takimi u mbajt pak orë para firmosjes së marrëveshjes dypalëshe për Planin e Veprimit për Inovacionin.

Në takim morën pjesë dhe drejtuesit e institucioneve kyçe të ekosistemit tonë të inovacionit dhe të koordinimit të projekteve strategjike.

“Ky Plan shënon një hap të madh përpara për Shqipërinë, që synon të kthehet në një qendër evropiane për AI të gjelbër dhe inovacion të qëndrueshëm. Diskutuam për projektet konkrete që po marrin jetë, nga fabrika AI dhe kampusi digjital, te përfshirja në teknologjitë më të avancuara si superkompjuterët dhe Qendra BCC në Korçë”, informoi ministri Gonxhja.

Sipas tij, partneriteti me Francën është çelësi për të afruar më shumë investime, për të rritur bashkëpunimin akademik dhe për të fuqizuar ekonominë kreative shqiptare.

Burimi ATSH