Komisioneri Shtetëror i Zgjedhjeve, Ilirjan Celibashi, deklaroi sot në një intervistë televizive se zarfet me fletët e votimit për votuesit jashtë vendit do të dërgohen nga data 8 deri më 17 prill. Ai theksoi se është parashikuar që ato të mbërrijnë tek votuesit brenda 24-48 orëve nga momenti i nisjes nga KQZ.

Celibashi po ashtu ka dhënë detaje mbi mënyrën se si do të realizohet votimi dhe numërimi i votës nga jashtë, si edhe planin e KQZ për të ofruar transparencë të plotë

“Në Evropë ndodhen 89% e shtetasve shqiptarë që kanë aplikuar. Ndërsa për në SHBA dhe Kanada posta do të kërkojë 3-5 ditë për çuar zarfet e votimit”, bëri të ditur Celibashi.

Ai tha se “janë rreth 99% e shtetasve të regjistruar gjithsej që ndodhen në Evropë, SHBA dhe Kanada. 1% e mbetur janë në vendet e tjera të botës”.

Celibashi u shpreh se, “data 7 ose 8 prill është afati maksimal për operatorin që ka marrë përsipër për të sjellë në Shqipëri fletët e votimit që do të nisen në diasporë”.

“Është një kompani sllovene tek e cila prej tashmë gati 30 vjetësh KQZ printon fletët e votimit përgjithësisht dhe kanë informuar se janë në përfundim të fletëve të votimit”, tha Celibashi.

Ai u shpreh se nga data 8 deri në datën 17 prill ecën njëkohësisht procesi përgatitjes së dokumentacionit dhe i dërgimit.

“Plani ynë është që për kontinentin e Amerikës dhe kontinentet e tjera jashtë Evropës do të dërgohen të para meqë duan pak më shumë ditë sesa kontinenti i Evropës si afat për t’u dërguar dhe kthyer mbrapsht zarfet”, tha Celibashi, duke u shprehur se në 17 prill duhet të përfundojë procesi i dërgimit të zarfeve me fletët e votimit.

Sa i përket përgatitje së zarfeve ai tha se është një proces që do të realizohet nga KQZ.

“Jemi dakordësuar me kompaninë e shërbimit postar që të kryhen procedurat në ambientet e KQZ-së”, tha ai.

Ai shtoi se procesi do të jetë transparent në sytë e përfaqësuesve të partive politike, të vëzhguesve ndërkombëtare dhe medias.

“Jemi duke parashikuar që procesi i përgatitjes së dokumentacionit zgjedhor të transmetohet live në në 4-5 kanale 24/7 në youtube. Dhe nëse ka interes një votues nga jashtë mund ta ndjekë”, tha Celibashi.

Ai tha se ky proces do të kërkoj rreth 60-75 njerëz që do të punojnë nga ora 08:00 e mëngjesit deri në orën 24:00 deri sa të dërgohen zarfet në diasporë.

Burimi ATSH