Universiteti “Aleksandër Moisiu” në Durrës është bërë pjesë e Aleancës Universitare Evropiane STARS EU. Lajmin e ka ndarë kryebashkiakja e këtij qyteti, Emirana Sako e cila ka pritur sot në një takim, nëntë rektorë të kësaj aleance.

Kryebashkiakja Sako është takuar me Presidentin e Komisionit të Aleancës STARS EU, Dick Pouwels, nga Universiteti Hanze, Holandë, me Prof. Dr. Shkëlqim Fortuzin, Rektor i UAMD, si edhe me rektorët e tjerë të universiteteve nga vendet e BE, ku siç pohon ajo, gjatë takimit është theksuar rëndësia e evropianizimit të arsimit të lartë dhe ndikimi që ka ndërkombëtarizimi në zhvillimin vendor, rajonal dhe më gjerë, si edhe në përgatitjen e një brezi të ri profesionistësh.

Sako pohon se “në këtë përfaqësi të rëndësishme na nderoi edhe Han Polman, Këshilltar Shtetëror i Holandës, Anila Troshani, kreu i EACEA, në Komisionin Evropian, si edhe përfaqësues të lartë të bashkive dhe ministrive të vendeve evropiane, aleate të UAMD-së në këtë aleancë universitare”.

Aleanca STARS EU po zhvillon konferencën treditore në Durrës duke synuar që ta kthejë këtë qytet në epiqendrën e jetës universitare evropiane.

Burimi ATSH