Sektori bankar shqiptar e mbylli vitin 2024 me një rezultat pozitiv.

Aktiviteti ekonomik, punësimi dhe pagat erdhën në rritje, duke gjeneruar më shumë të ardhura për bizneset dhe familjet shqiptare. Zgjerimi i aktivitetit ekonomik gjatë vitit 2024 u nxit nga rritja e shpenzimeve familjare dhe e investimeve të bizneseve dhe është pasqyruar në rritje të sektorit të shërbimeve dhe të ndërtimit.

Paralelisht me këto zhvillime, inflacioni ka ardhur në rënie, duke shënuar një rikuperim të plotë të goditjeve nga rritjet e çmimeve në tregjet ndërkombëtare.

Sistemi bankar është i mirëkapitalizuar dhe kreditimi ekonomisë po vijon me trend pozitiv rritjeje.

Këshilli Mbikëqyrës i Bankës së Shqipërisë në mbledhjen e së mërkurës, mori në shqyrtim dhe miratoi Raportin Vjetor të Bankës së Shqipërisë për vitin 2024, që parashtron treguesit financiarë për vitin që lamë pas.

Raporti vjetor përbën një detyrim ligjor të Bankës së Shqipërisë, me anë të të cilit realizohet llogaridhënia para Kuvendit të Shqipërisë dhe komunikimi me sistemin financiar, mediet dhe publikun.

Ai përbën dokumentin më të rëndësishëm që, në mënyrë transparente, informon Kuvendin mbi vendimmarrjen e Këshillit Mbikëqyrës dhe veprimtarinë e Bankës së Shqipërisë, në përmbushje të objektivave të saj institucionalë, monetarë, operacionalë dhe zhvillimorë.

Në raport, ndër të tjera, pasqyrohen: Zhvillimet e përgjithshme makroekonomike në vend; politika monetare dhe ajo valutore e ndjekur nga Banka e Shqipërisë; zhvillimet në sistemin bankar dhe rreziqet potenciale me të cilat përballet stabiliteti financiar; aktiviteti mbikëqyrës, licencues dhe rregullator; aktiviteti i emisionit monetar, i sistemit të pagesave, i administrimit të rezervës valutore, statistikor, kërkimor, komunikues dhe ai i edukimit të publikut; administrimi i burimeve njerëzore; veprimtaria e kontrollit të brendshëm; objektivat afatmesëm të institucionit.

Në mbledhjen e Këshilli Mbikëqyrës u shqyrtua dhe miratua përdorimi i fitimit të Bankës së Shqipërisë për vitin 2024.

Ndërsa Këshilli Mbikëqyrës u njoh dhe me informacione të tjera të lidhura me veprimtarinë e përditshme funksionale dhe operacionale të Bankës së Shqipërisë.

ATSH