Ministri për Europën dhe Punët e Jashtme, Igli Hasani u shpreh sot se vizita e Sekretarit amerikan të Shtetit, Antony Blinken në Tiranë është një gur kilometrik që vjen pas angazhimit të rëndësishëm që ka treguar Shqipëria.

“Një ditë e gjatë, një ditë e bukur. Një gur kilometrik që vjen pas një angazhimi të rëndësishëm që pati Shqipëria. Por edhe për të gjithë rajonin, Europën dhe marrëdhëniet me SHBA-në. Shqipëria ka treguar që është një faktor stabiliteti jo vetëm në rajon, por edhe më gjerë. Angazhimi që ne kemi vërteton një të vërtetë që duke u angazhuar me Shqipërinë, stabiliteti dhe mirëqenia janë faktorë evidentë”, u shpreh ministri në një intervistë televizive.

Me vizitën e sekretarit amerikan të Shtetit Antony Blinken në Tiranë, u firmosën edhe dy marrëveshje të rëndësishme mes SHBA-së dhe Shqipërisë.

Ministri Hasani ka ndarë detaje nga këto marrëveshje, duke thënë se një prej marrëveshjeve ka të bëjë me çështjet e edukimit me progamin e bursave, që dyfishon mundësinë e shqiptarëve për të aplikuar.

Ndërsa marrëveshja e dytë ka të bëjë me çështjen e dezinformimit.