Ministrja e Shëndetësisë dhe Mbrojtjes Sociale, Albana Koçiu u shpreh sot se objektiv mbetet krijimi i poleve të ekselencës në shëndetësi të shtrira në të gjithë vendin.

Koçiu ishte e pranishme sot në aktivitetin e organizuar për dorëzimin e Kartës së Autonomisë Menaxheriale për 5 spitale, Qendrën Spitalore Universitare Nënë Tereza (QSUNT), Spitalet Rajonale të Shkodrës, Lezhës, Durrësit dhe Vlorës.

Ministrja u shpreh se “nuk ka qenë aspak e lehtë, sepse për të ardhur deri këtu, këto spitale kanë përgatitur objektiva të qarta zhvillimi, plane pune, strategji zhvillimi, protokolle të burimeve njerëzore, udhërrëfyes dhe indikatorë performance”.

“Objektivi ynë për në vijim janë spitale, që ashtu si në të gjithë botën e përparuar, lidhin kontrata me kompanitë e sigurimeve apo kostifikojnë shërbimet e tyre; mjekë që falë praktikës dyfishe, zgjedhin të punojnë më gjatë brenda strukturës së tyre spitalore, të përfitojnë dhe të angazhohen më shumë brenda sistemit”, tha ajo.

Po ashtu, Koçiu u shpreh se synohet që të krijohen struktura drejtuese që përzgjedhin burimet njerëzore apo që në përputhje me nevojat dhe vizionin e spitalit të zgjerojnë shërbimet për të ofruar akoma më shumë cilësi ndaj qytetarëve.

“Spitale që bashkëveprojnë me qendra shkencore dhe qendra mjekësore jashtë vendit, përfshi me mjekët e profesionistët e diasporës, e shumë më tej”, tha ajo.