Shqipëria do të prezantohet nga data 3 deri më 5 nëntor në World Travel Market London 2026, një nga panairet dhe platformat më të rëndësishme ndërkombëtare të industrisë së turizmit, që zhvillohet në qendrën e ekspozitave ExCeL London, në Mbretërinë e Bashkuar.

Ministri i Turizmit, Kulturës dhe Sportit, Blendi Gonxhja tha sot se “pjesëmarrja në këtë panair është një mundësi për të promovuar bukuritë, kulturën, mikpritjen dhe eksperiencat unike që ofron vendi ynë, si dhe për të krijuar ura të reja bashkëpunimi me profesionistë dhe partnerë nga e gjithë bota”.

Në këtë panair, Shqipëria synon të tërheqë vëmendjen e operatorëve turistikë, agjencive të udhëtimit, investitorëve dhe profesionistëve të sektorit, duke krijuar mundësi të reja bashkëpunimi dhe partneritetesh me aktorë të rëndësishëm të industrisë globale të turizmit.

World Travel Market (WTM) në Londër është një nga panairet më të mëdha dhe më prestigjioze ndërkombëtare të turizmit, që mbledh çdo vit profesionistë, operatorë dhe vendimmarrës nga e gjithë bota.

Ky panair ofron një platformë unike për promovimin e destinacioneve turistike, zhvillimin e marrëdhënieve të biznesit dhe eksplorimin e trendeve më të fundit në industrinë globale të turizmit.

Edicioni i vitit 2026 zhvillohet për tri ditë, më 3, 4 dhe 5 nëntor, në ExCeL London dhe pritet të mbledhë mbi 46 mijë pjesëmarrës, më shumë se 4 mijë ekspozues dhe përfaqësues nga mbi 180 vende të botës.

Përveç mundësive për takime dhe marrëveshje biznesi, aktiviteti do të shërbejë edhe si një hapësirë për shkëmbimin e përvojave dhe diskutimin e zhvillimeve më të fundit në industrinë e udhëtimeve, përfshirë turizmin e qëndrueshëm, inovacionin teknologjik, ndryshimin e preferencave të turistëve dhe zhvillimin e përvojave autentike turistike.

Në këtë kuadër, prezantimi i Shqipërisë në një platformë të tillë ndërkombëtare merr rëndësi të veçantë për rritjen e dukshmërisë së vendit në tregun global, zgjerimin e hartës së bashkëpunimeve dhe promovimin e një oferte turistike që shtrihet përtej sezonit veror, duke përfshirë turizmin kulturor, natyror, malor, kulinar dhe atë të aventurës.

Pjesëmarrja në World Travel Market London 2026 synon të kontribuojë në forcimin e pozicionit të Shqipërisë si një destinacion gjithnjë e më konkurrues dhe tërheqës në hartën ndërkombëtare të turizmit.

Burimi ATSH