Kërkesa për kredi nga bizneset dhe individët u rrit në tremujorin e tretë të vitit 2026, ndërsa bankat presin një ecuri pozitive edhe në tremujorin e fundit të vitit, sipas vrojtimit të Bankës së Shqipërisë mbi aktivitetin kreditues.

Sipas raportit, kërkesa për kredi nga bizneset u rrit në të gjitha segmentet, pavarësisht madhësisë së tyre, si për financimin e investimeve, ashtu edhe për mbulimin e nevojave për likuiditet. Kjo rritje u mbështet nga nevojat më të larta për investime dhe financimin e inventarëve e kapitalit qarkullues, si dhe nga treguesit e besimit të biznesit dhe niveli i përgjithshëm i normave të interesit.

Në të njëjtën kohë, kushtet dhe termat e kreditimit për bizneset u lehtësuan, kryesisht përmes kërkesave më të ulëta për kolateral, veçanërisht për bizneset e vogla dhe të mesme. Shkalla e miratimit të kredive për bizneset u rrit lehtë, e ndikuar kryesisht nga pasqyrat financiare të tyre.

Për tremujorin e fundit të vitit, bankat presin që standardet e kreditimit të mbeten të lehtësuara për bizneset e vogla dhe të mesme, ndërsa për bizneset e mëdha parashikohet të qëndrojnë pothuajse të pandryshuara. Gjithashtu, kërkesa për kredi nga bizneset pritet të vijojë rritjen.

Sa i përket individëve, standardet e kreditimit mbetën të pandryshuara në tremujorin e tretë, si për kreditë për blerjen e banesave, ashtu edhe për kreditë konsumatore. Megjithatë, shkalla e miratimit të kredive për individët ra, kryesisht për shkak të historikut në regjistrin e kredive.

Raporti vëren se, kërkesa e individëve për kredi u rrit gjatë periudhës, kryesisht për kreditë konsumatore, e nxitur nga nevojat për financimin e konsumit. Nga ana tjetër, kërkesa për kredi për blerjen e banesave shënoi rënie, ndikuar nga perceptimi i bankave mbi situatën aktuale dhe të pritshme në tregun e pasurive të paluajtshme.

Për tremujorin e katërt, bankat presin që kërkesa për kredi nga individët të mbetet e lartë, si për financimin e konsumit, ashtu edhe për blerjen e banesave, ndërsa standardet e kreditimit parashikohet të mos ndryshojnë.

Burimi ATSH