Projektligji “Për pronat e paluajtshme të Shtetit në Republikën e Shqipërisë” është nxjerrë për konsultim publik nga Ministria e Drejtësisë, duke propozuar një kuadër të unifikuar për administrimin, regjistrimin, transferimin dhe disponimin e pronave shtetërore.

Projektligji përcakton vijën bregdetare, bregun e detit, rërën bregdetare, plazhet dhe ujërat territoriale, si dhe shtretërit e brigjet e lumenjve, liqenet, lagunat, rezervuarët dhe burimet natyrore, si prona publike të patjetërsueshme. Sipas draftit, pronësia mbi këto pasuri nuk mund të transferohet në pronësi private dhe nuk mund të fitohet përmes parashkrimit fitues.

Ndërkohë, pronat shtetërore jopublike, përfshirë toka bujqësore, troje, ndërtesa dhe aktive të tjera që nuk mbulohen nga ligje të posaçme, do t’i nënshtrohen rregullave të Kodit Civil, njësoj si prona private.

Drafti parashikon që disponimi ekonomik i pronës shtetërore të kryhet, si rregull, përmes procedurave konkurruese, duke përfshirë shitjen me ankand, shkëmbimin, dhënien me qira, enfiteozën dhe forma të tjera të përdorimit të parashikuara nga legjislacioni.

Një dispozitë e veçantë lidhet me zhvillimet në territor, ku prona shtetërore mund të kalojë në pronësi private në funksion të planeve të përgjithshme vendore, me kusht që pjesa shtetërore të mos jetë më e madhe se 20% e pronës që do të zhvillohet. Kushtet, kriteret dhe procedurat për këtë mekanizëm do të përcaktohen nga Këshilli i Ministrave.

Sipas relacionit shpjegues, projektligji synon rritjen e vlerës optimale të pronës shtetërore, forcimin e transparencës dhe llogaridhënies, si dhe unifikimin e procedurave për administrimin dhe disponimin e pasurive të shtetit.

Marrë nga ATSH