Mali i Tomorit mirëpret këtë javë mijëra besimtarë bektashinj dhe vizitorë nga Shqipëria dhe vende të ndryshme të botës, të cilët i bashkohen festimeve tradicionale të Festës së Kulmakut.

Kryeministri Edi Rama ndau sot në rrjetet sociale pamje nga kjo festë, e kthyer tashmë në një nga ngjarjet më të rëndësishme shpirtërore dhe kulturore të zonës.

“Mali i Tomorit, këtë javë mirëpret besimtarë bektashinj dhe vizitorë nga Shqipëria e gjithë bota për t’iu bashkuar një prej traditave më të bukura shpirtërore e kulturore të zonës, Festës së Kulmakut”, tha Rama.

Festa e Kulmakut zhvillohet në lartësitë e malit të Tomorit, duke sjellë së bashku besimtarë, pelegrinë dhe vizitorë të shumtë.

Për besimtarët bektashinj, kjo festë përfaqëson një moment të veçantë lutjeje, reflektimi dhe bashkimi shpirtëror. Krahas dimensionit fetar, aktivitetet në malin e Tomorit përcjellin edhe tradita të hershme kulturore e komunitare, duke e kthyer këtë periudhë në një moment të rëndësishëm për trashëgiminë shpirtërore të zonës.

Festa e Kulmakut mbetet një prej traditave të trashëguara ndër breza që e vendos malin e Tomorit në qendër të vëmendjes si një prej vendeve më të rëndësishme të pelegrinazhit në Shqipëri.

Burimi ATSH