Lufta biologjike për mbrojtjen e bimëve po gjen gjithnjë e më shumë zbatim në fermat shqiptare, si një praktikë që synon rritjen e cilësisë së prodhimit, rendimentit dhe konkurrueshmërisë së produkteve bujqësore në tregjet ndërkombëtare.

Ministri i Bujqësisë dhe Zhvillimit Rural solli si shembull fermerët Ylli Kiçi dhe Saimir Parraqi në Sulzotaj, të cilët kultivojnë speca në sera, duke zbatuar praktika të mira bujqësore dhe metoda të luftës biologjike për mbrojtjen e kulturave.

Ndërkohë, fermeri Ylli Kiçi kultivon edhe 2 hektarë me shalqi të vonë, duke diversifikuar prodhimin dhe shfrytëzuar potencialin e bujqësisë së mbrojtur.

“Ferma model të suksesshme” po shfaqen në zona të ndryshme të vendit, duke pasqyruar, sipas ministrit, drejtimin e ri të bujqësisë shqiptare: prodhim të lartë, cilësi dhe standarde konkurruese në tregjet ndërkombëtare.

Tashmë përdorimi i metodave të mbrojtjes biologjike mbështetet edhe përmes Skemës Kombëtare të Mbështetjes në Bujqësi. Në 12 masat e Skemës Kombëtare 2026 është përfshirë Masa 5, “Mbështetje për luftimin biologjik në sera dhe tunele plastike”.

Sipas të dhënave të publikuara nga AZHBR, për këtë masë janë kualifikuar 362 aplikime, duke treguar interesin në rritje të fermerëve për përdorimin e metodave biologjike në mbrojtjen e kulturave dhe për një prodhim më të qëndrueshëm e cilësor.

Mbështetja për luftën biologjike synon të nxisë fermerët të përdorin metoda më të qëndrueshme për kontrollin e dëmtuesve, duke kontribuar në përmirësimin e cilësisë së produkteve dhe në rritjen e standardeve të prodhimit bujqësor shqiptar.

Burimi ATSH