Ministrja e Ekonomisë dhe Inovacionit, Delina Ibrahimaj zhvilloi sot një vizitë në një biznes në njësinë numër 2 në Tiranë, ku u ndal te përfitimet e programit “Dyfisho Sipërmarrjen tënde”.

Ibrahimaj theksoi se programi mundëson financim për biznese që mund të investojnë deri në 2 milionë euro, me afat maturiteti deri në 10 vjet.

“Në biznesin “Europtik”, pata kënaqësinë të bisedoj me Jonidën për rrugëtimin e saj si sipërmarrëse, sfidat që ka kapërcyer ndër vite dhe planet për zgjerimin e mëtejshëm të aktivitetit. Nga një dyqan i vogël i hapur në vitin 2012, Europtik është shndërruar në një biznes të konsoliduar që përfaqëson disa nga markat më të njohura ndërkombëtare të syzeve dhe synon të zgjerohet edhe jashtë Tiranës”, u shpreh Ibrahimaj.

Ministrja theksoi se histori të tilla tregojnë se sipërmarrja shqiptare ka potencial të vazhdojë të rritet kur ka akses në financim dhe mbështetje për investime.

Sipas saj, “Dyfisho Sipërmarrjen Tënde” është një mundësi për të marrë një financim me kosto të ulët, deri në 3% normë interesi.

“Me programin ‘Dyfisho Sipërmarrjen Tënde’ synojmë t’u japim bizneseve këtë mundësi, duke ofruar financim me normë interesi preferenciale, Garanci Sovrane dhe mbështetje për hartimin e biznesplanit”, u shpreh Ibrahimaj.

Ministrja siguroi se qeveria do të vazhdojë të jetë pranë bizneseve në të gjithë Shqipërinë, për t’i informuar dhe mbështetur në realizimin e investimeve të tyre.

Burimi ATSH