Kryeministri Edi Rama e ka cilësuar si një moment krenarie vendimin e Aleancës së Atlantikut të Veriut që samiti i ardhshëm i NATO-s të zhvillohet në Shqipëri.

Rama publikoi në rrjetet sociale një fotografi me sekretarin e përgjithshëm të NATO-s, Mark Rutte në përfundim të samitit në Ankara, teksa thekson se pas viteve me shumë punë e durim të madh e paimagjinueshmja bëhet e mundur.

“Ai momenti i krenarisë kur të bëhet zemra mal, pasi kalojnë vite me shumë punë e durim të madh dhe vjen dita kur e paimagjinueshmja bëhet e mundur, e i thua Sekretarit të Përgjithshëm të NATO-s: Shihemi në Shqipëri për samitin e ardhshëm”, shkruan Rama.

Më herët gjatë një konference për mediet në përfundim të punimeve të Samitit të NATO-s në Ankara, sekretari i përgjithshëm Mark Rutte njoftoi se samiti i ardhshëm i Aleancës së Atlantikut të Veriut do të organizohet në Shqipëri.

Rama ndodhet në Ankara, ku merr pjesë në punimet e samitit të NATO-s, që ka mbledhur krerët e shteteve dhe qeverive të vendeve anëtare të Aleancës për të diskutuar sfidat aktuale të sigurisë dhe prioritetet strategjike.

Burimi ATSH