Zëvendëskryeministrja Albana Koçiu reagoi sot pas protestës së zhvilluar para Kuvendit, ku dënoi aktet e dhunës ndaj institucioneve shtetërore.

Përmes një postimi në rrjetet sociale, të shoqëruar me videon e një prej protestuesve, Koçiu deklaroi se rrethimi i institucioneve me dhunë fizike dhe verbale “nuk është as demokraci dhe as protestë, por tentativë për konflikt dhe përplasje”.

“Në darkë, tregon recetën për brumin e demokracisë me vezë e miell, ndërsa në mëngjes, gatuan bashkë me disa të tjerë çorbën e trazuar që përpiqet të helmojë Shqipërinë. Kur vjen radha për përgjegjësi, si zakonisht, fajin e kanë qeveria dhe Policia që ia mbushin protestuesve duart me vezë e me gurë. Rrethimi i institucioneve me dhunë fizike e verbale nuk është as demokraci dhe as protestë, por tentativë për konflikt dhe përplasje”, shkruan Koçiu.

Koçi se autorët e akteve të dhunshme do të përballen me ligjin, duke theksuar se përgjegjësia është individuale për çdo person që ushtron dhunë dhe tenton të cenojë rendin kushtetues.

“Përballja me ligjin do të jetë e pashmangshme për këdo “buf Saliu” të maskuar si protestues paqësor që ushtron dhunë dhe tenton prishjen e rendit kushtetues. Këta janë thjesht pengmarrësit e protestës së shëndoshë qytetare, kuzhinierët e dhunës që kanë dalë nga kusitë e Saliut dhe që dinë të shpërndajnë vetëm atë gjuhë urrejtjeje, e cila ka bllokuar prej gjithë këtyre kohësh kanalet e komunikimit me ujërat e llumit të tyre të vjetër”, tha ajo.

Burimi ATSH