Zëvendëskryeministrja Albana Koçiu, së bashku me kryebashkiakun e Elbasanit, Gledian Llatja dhe drejtuesin politik të Partisë Socialiste për qarkun Elbasan, Arbjan Mazniku, inspektuan sot ecurinë e punimeve në parkun multifunksional “Dua të luaj”, një investim i ri publik që po realizohet në qytetin e Elbasanit.

Koçiu bëri të ditur se projekti, me vlerë 200 milionë lekë, po shkon drejt përfundimit dhe do të krijojë një hapësirë moderne rekreative dhe sportive për qytetarët e të gjitha grupmoshave.

“Drejt përfundimit parku multifunksional ‘Dua të luaj’ në Elbasan, një investim i Qeverisë Shqiptare prej 200 milionë lekësh, me fusha sportive, pista vrapimi, biçikletash, kënde lojërash, gjelbërim dhe ambiente shërbimi për qytetarët e çdo moshe”, u shpreh Koçiu.

Kryetari i bashkisë Elbasan, Gledian Llatja, tha se projekti po transformon një ish-repart ushtarak të degraduar prej vitesh në një park modern, me sipërfaqe rreth 23 mijë metra katrorë.

Sipas tij, kompleksi do të përfshijë pistë vrapimi prej 430 metrash, pista biçikletash, kënde lojërash për fëmijë, hapësira rekreative për të moshuarit, si dhe terrene sportive për futboll, basketboll, tenis dhe padel.

“Ky është një park i qytetit që do t’u shërbejë të gjithë qytetarëve dhe që pritet të ketë frekuentim të lartë pas përfundimit të punimeve”, tha Llatja.

Nga ana e saj, Koçiu theksoi se investimi i realizuar përmes Fondit Shqiptar të Zhvillimit synon jo vetëm krijimin e një hapësire argëtimi, por edhe rigjallërimin e një zone periferike të qytetit.

Ajo nënvizoi se projekte të ngjashme po realizohen edhe në qytete të tjera të vendit, me synimin për t’i kthyer hapësirat e lëna pas dore në zona rekreative dhe sociale në funksion të komunitetit.

“Do të vazhdojmë të investojmë në projekte të tilla, duke transformuar zona të nënshfrytëzuara në hapësira moderne që u shërbejnë fëmijëve, të rinjve, familjeve dhe të moshuarve”, deklaroi Koçiu.

Parku multifunksional “Dua të luaj” do të ofrojë kushte për aktivitete sportive, rekreative dhe sociale, duke krijuar një prej hapësirave më të mëdha publike të këtij lloji në Elbasan.

Burimi ATSH