Ministri për Evropën dhe Punët e Jashtme, Ferit Hoxha, zhvilloi një takim në Vilnius me kryetarin e Komisionit Parlamentar për Punët e Jashtme të Lituanisë, Remigijus Motuzas, ku në fokus ishte bashkëpunimi ndërparlamentar dhe mbështetja për procesin e integrimit evropian të Shqipërisë.

Në një postim në rrjetin social X, Hoxha vlerësoi rolin e diplomacisë parlamentare dhe bashkëpunimit të zgjeruar ndërparlamentar si instrumente të rëndësishme për avancimin e objektivave të përbashkëta, përfshirë rrugën e Shqipërisë drejt anëtarësimit në Bashkimin Evropian.

“Ne ramë dakord për rolin e rëndësishëm të diplomacisë parlamentare dhe bashkëpunimit të zgjeruar ndërparlamentar si instrumente të vlefshme për avancimin e objektivave tona të përbashkëta, duke përfshirë rrugën e Shqipërisë drejt anëtarësimit në BE, ku i jemi mirënjohës Lituanisë për mbështetjen e saj të vazhdueshme”, shkruan Hoxha.

Sipas ministrit Hoxha, në kushtet e një mjedisi sigurie gjithnjë e më kompleks, Shqipëria dhe Lituania mbeten të bashkuara për forcimin e unitetit të NATO-s, ruajtjen e sigurisë euroatlantike dhe mbrojtjen e vlerave demokratike.

Hoxha theksoi gjithashtu se agresioni i vazhdueshëm i Rusisë kundër Ukrainës përbën kërcënimin më të madh për arkitekturën e sigurisë në Evropë, duke nënvizuar se uniteti, solidariteti dhe bashkëpunimi i ngushtë midis aleatëve dhe partnerëve janë thelbësorë për ruajtjen e paqes dhe stabilitetit në kontinent.

“Në këtë moment kritik, uniteti, solidariteti dhe bashkëpunimi i ngushtë midis Aleatëve dhe partnerëve janë më thelbësore se kurrë për të mbrojtur vetë parimet mbi të cilat paqja dhe stabiliteti në kontinentin tonë janë ndërtuar prej kohësh”, përfundoi Hoxha.

Burimi ATSH