Muzeu Arbëresh që pritet të ngrihet në Vuno synon të shërbejë si një hapësirë muzeale bashkëkohore kushtuar historisë së arbëreshëve dhe emigrimit të tyre drejt Italisë.

Në Vuno u prezantua publikisht projektideja për Muzeun Arbëresh, një nismë e Ministrisë së Turizmit, Kulturës dhe Sportit në bashkëpunim me bashkinë e Himarës dhe studion projektuese.

Ministri i Turizmit, Kulturës dhe Sportit, Blendi Gonxhja vlerësoi rëndësinë e këtij projekti për trashëgiminë kulturore dhe identitetin kombëtar.

“Ky projekt synon krijimin e një hapësire muzeale bashkëkohore kushtuar historisë së arbëreshëve, emigrimit drejt Italisë dhe trashëgimisë së vyer që ky komunitet ka ruajtur ndër shekuj”, u shpreh Gonxhja.

Takimi mblodhi përfaqësues institucionesh, ekspertë të trashëgimisë kulturore, aktorë të turizmit, përfaqësues të komunitetit lokal dhe qytetarë të interesuar, duke hapur një diskutim mbi rolin që muzeu pritet të ketë në ruajtjen e kujtesës historike, edukimin dhe zhvillimin kulturor e turistik të zonës.

Ministri vuri në dukje se “ky projekt synon të kthehet në një pikë referimi për identitetin, historinë dhe kulturën shqiptare, si dhe në një hapësirë që lidh të shkuarën me brezat e ardhshëm”, teksa nënvizoi rëndësinë e tij si urë mes trashëgimisë dhe zhvillimit bashkëkohor kulturor.

Burimi ATSH