Takimi i Komitetit të Ministrave të Këshillit të Evropës përfundoi djebnë Kishinev të Moldavisë, sipas “Euronews”.

Në krye të agjendës së liderëve evropianë ishin mbështetja e fortë për Ukrainën, forcimi i sigurisë demokratike, lufta kundër manipulimit të informacionit dhe ndërhyrjeve të huaja, si dhe menaxhimi i flukseve migratore.

Ndër vendimet më të rëndësishme, të propozuara me nismën e Italisë, veçohet miratimi i një interpretimi të ri të Konventës Evropiane për të Drejtat e Njeriut, që synon të lehtësojë procedurat e dëbimit të disa emigrantëve dhe të hapë rrugë për përdorimin e “qendrave të riatdhesimit” në vende të treta.

Çfarë parashikon deklarata e Këshillit të Evropës?

Deklarata e miratuar përcakton interpretimin e neneve 3 dhe 8 të Konventës Evropiane për të Drejtat e Njeriut, që lidhen me ndalimin e torturës dhe trajtimit çnjerëzor apo degradues, si dhe me të drejtën për jetë private dhe familjare.

Dokumenti mbështet bashkëpunimin me vende të treta në fushën e migracionit, përfshirë përdorimin e qendrave të riatdhesimit, me kusht që këto vende të respektojnë Konventën Evropiane për të Drejtat e Njeriut.

Në tekst theksohet se ndalimi i torturës dhe trajtimit çnjerëzor mbetet absolut, por vlerësimi nëse një trajtim arrin nivelin e “çnjerëzor ose degradues” varet nga rrethanat konkrete të secilit rast.

Sa i përket nenit 8, deklarata nënvizon se shtetet mund të dëbojnë shtetas të huaj edhe kur kjo prek jetën e tyre private dhe familjare, nëse masa justifikohet nga një qëllim legjitim, siç është siguria kombëtare. Në raste të tilla, Gjykata Evropiane e të Drejtave të Njeriut duhet të ketë “arsye të forta” për të rrëzuar vendimin e një shteti.

Reagimi i Melonit

Kryeministrja italiane Giorgia Meloni e përshëndeti rezultatin, duke e quajtur një njohje të qasjes italiane në menaxhimin e migracionit.

“Deklarata e Kishinaut, e miratuar nga 46 shtetet anëtare të Këshillit të Evropës, njeh legjitimitetin e vendeve për të ndjekur zgjidhje inovative në menaxhimin e migracionit, siç janë qendrat e riatdhesimit në vende të treta, duke ndjekur modelin Itali–Shqipëri”, shkroi ajo në rrjetet sociale.

Sipas saj, ky është një rezultat i rëndësishëm që tregon se qasja e Italisë ndaj migracionit është bërë pjesë e debatit dhe praktikës evropiane.

“Ajo që një vit më parë ishte ende objekt debati, sot është kthyer në një parim të pranuar nga 46 shtetet anëtare të Këshillit të Evropës”, shtoi Meloni.

Ukraina dhe drejtësia ndërkombëtare

Përtej çështjes së migracionit, shtetet anëtare riafirmuan mbështetjen e tyre për Ukrainën, me fokus në mekanizmat ndërkombëtarë për mbajtjen përgjegjëse të Rusisë për agresionin.

Në takim 36 shtete, përfshirë Italinë dhe Bashkimin Evropian, miratuan gjithashtu vendimin për krijimin e një Tribunali Special për krimin e agresionit kundër Ukrainës.

Burimi ATSH