Edicioni i radhës i Gran Premio di Bari që u zhvillua nga data 23-26 prill, u përmbyll me një atmosferë pozitive dhe mesazhe bashkëpunimi mes institucioneve dhe organizatorëve të pasionuar pas botës automotive.

Në ditën finale të aktivitetit, përfaqësues nga Drejtoria e Përgjithshme e Shërbimeve të Transportit Rrugor (DPSHTRR) dhe drejtues të Old Cars Club Bari, vlerësuan kontributin e ndërsjellë në promovimin e eventeve motorsportive dhe automjeteve historike.

Ceremonia u mbajt në ambientet e Bashkisë së Barit, ku përfaqësuesit e DPSHTRR u vlerësuan për angazhimin dhe pjesëmarrjen aktive ndër vite në këtë event, që tashmë është kthyer në një traditë të rëndësishme për dashamirësit e mjeteve klasike.

Pjesëmarrja shqiptare në këtë aktivitet me automjetet Retro, shihet si një urë lidhëse mes dy vendeve, duke nxitur shkëmbimin e përvojave, ideve dhe kulturave në fushën e trashëgimisë automotive.

Përfaqësuesit theksuan se bashkëpunimi do të vijojë të thellohet edhe në të ardhmen, me synimin për të promovuar më tej vlerat historike dhe turistike që mbartin mjetet retro.

Gran Premio di Bari mbetet një nga aktivitetet më të veçanta në Itali për ekspozimin e automjeteve me vlerë historike, duke tërhequr çdo vit pjesëmarrës dhe vizitorë nga vende të ndryshme.

Marrë nga ATSH