Ministrja e Arsimit, Mirela Kumbaro, priti në një vizitë zyrtare në Tiranë Ministrin e Arsimit, Shkencës, Teknologjisë dhe Inovacionit të Kosovës, Hajrulla Çeku.

Në takimin bilateral mes dy ministrave, në qendër të diskutimeve ishte forcimi i bashkëpunimit në arsimin parauniversitar dhe atë të lartë.

Ministrja Kumbaro theksoi do të intensifikohet bashkëpunimi në arsimin parauniversitar dhe atë të lartë mes Shqipërisë dhe Kosovës.

“Ky takim merr vlerë simbolike në një ditë të veçantë të gjuhës sonë, në nisje të Olimpiadës së dytë të përbashkët Shqipëri-Kosovë, e cila nis sot në të gjitha shkollat 9-vjeçare në Shqipëri dhe Kosovë për gjuhën shqipe, identitetin që na bashkon ndër shekuj. Me Ministrinë e Arsimit të Kosovës kemi punuar intensivisht për unifikimin e kurrikulave dhe programeve mësimore, si dhe për botimin e teksteve të përbashkëta për diasporën, tashmë të digjitalizuara, të cilat u vijnë në ndihmë nxënësve shqiptarë kudo në botë”, theksoi Kumbaro.

Nga ana e tij, ministri Çeku e cilësoi bashkëpunimin mes dy ministrive si të jashtëzakonshëm duke nënvizuar arritje të rëndësishme si abetarja e përbashkët, me të cilën mësojnë nxënësit në Kosovë, Shqipëri, në disa komuna të Maqedonisë së Veriut dhe në diasporë.

Në bashkëpunim me Ministrinë e Arsimit të Kosovës janë miratuar nivelet I, II dhe III të teksteve për diasporën “Gjuha shqipe dhe kultura shqiptare”, që përfshijnë grupmoshat e klasave 1–3, 4–6 dhe 7–9. Këto tekste tashmë janë edhe të digjitalizuara, duke e konsoliduar më tej mësimin e gjuhës shqipe në diasporë.

Një tjetër nismë me rëndësi është Olimpiada e përbashkët e Gjuhës Shqipe, e cila nis sot dhe përfshin nxënësit e klasave të nënta nga Shqipëria dhe Kosova. Ajo do të përmbyllet më 23 maj në Prishtinë, ku ministrja Kumbaro do të zhvillojë edhe një vizitë zyrtare.

Burimi ATSH