Ministri i Mjedisit, Sofjan Jaupaj, deklaroi sot se marrëveshja “Green Vjosa (Vjosa e gjelbër) – Zhvillim rajonal i gjelbër dhe gjithëpërfshirës në zonën e ujëmbledhësit të Parkut Kombëtar të Vjosës” përbën një model të ri zhvillimi për Shqipërinë, i cili vendos në qendër balancën mes mbrojtjes së natyrës dhe zhvillimit ekonomik.

Gjatë prezantimit të marrëveshjes ndërmjet qeverisë shqiptare dhe qeverisë së Republikës Federale të Gjermanisë për bashkëpunimin teknik, Jaupaj theksoi se dokumenti u nënshkrua më 3 shkurt 2026 dhe pasqyron vullnetin e përbashkët për të investuar në një të ardhme të qëndrueshme.

Sipas tij, mbështetja financiare e projektit është në vlerën 3 milionë euro grant dhe synon të sjellë ekspertizë dhe modele moderne të menaxhimit të burimeve natyrore.

Sipas ministrit, lumi Vjosa përfaqëson një pasuri unike dhe një simbol të turizmit të qëndrueshëm, ku vetëm vitin e kaluar janë regjistruar mbi 200 mijë vizitorë.
“Projekti synon ta kthejë këtë pasuri natyrore në një motor zhvillimi për komunitetet locale”, tha ministri.

Ai shtoi se do të forcohen institucionet dhe menaxhimi efikas i zonës, mbrojtja e biodiversitetit dhe ndërgjegjësimi mjedisor, si dhe do të zhvillohet ekonomia lokale dhe punësimi në të gjithë pellgun ujëmbledhës të Vjosës.

Po ashtu, projekti pritet të kontribuojë në forcimin e identitetit kulturor duke bashkuar pasuritë natyrore të lumit Vjosa me trashëgiminë natyrore të qarqeve Gjirokastër, Fier dhe Vlorë.

Jaupaj theksoi se iniciativa kontribuon drejtpërdrejt në objektivat e zhvillimit të qëndrueshëm dhe përfaqëson një investim për të ardhmen e natyrës dhe komuniteteve që jetojnë në pellgun ujëmbledhës të Vjosës, ku banojnë rreth 70 mijë banorë.

Më 27 prill, ministri federal gjerman i Mjedisit, Carsten Schneider, pritet të vizitojë lumin Vjosa për të lançuar zyrtarisht projektin, duke forcuar më tej bashkëpunimin shqiptaro-gjerman në fushën e mjedisit.

Burimi ATSH