Ligji për “Sigurimin e detyrueshëm të banesave nga tërmetet” pritet të kalojë për miratim në Kuvend deri në fund të qershorit 2026.

Lajmin e konfirmoi sot gjatë një konference për shtyp ministri i Financave, Petrit Malaj, i cili theksoi se ligji u është përcjellë të gjitha ministrive të linjës që duhet të japin komentet e tyre dhe të shprehin dakordësinë.

“Sapo të përfundojë ky proces, ligji do të kalojë në Këshill të Ministrave për t’u miratuar dhe pastaj në parlament. Objektivi ynë është që brenda 6-mujorit të parë të këtij viti ta miratojmë ligjin në parlament. Megjithatë janë procedurat parlamentare që marrin më tepër kohë”, shtoi Malaj.

Projektligji “Për sigurimin e detyrueshëm të banesave nga tërmetet” synon ndërtimin e një sistemi të qëndrueshëm të sigurimit për të garantuar dëmshpërblimet e qytetarëve në kushtet e ndodhjes së ngjarjeve katastrofike siç është tërmeti.

Marrë nga ATSH