Ministri i Financave, Petrit Malaj deklaroi sot se “ulja e akcizës, prej 8 lekësh, do të llogaritet nga vetë Bordi i Transparencës në momentin që çmimi kalon 220 lekë për litër dhe bizneseve u komunikohet çmimi i reduktuar i tregtimit me pakicë prej 213 lekësh”.

Gjatë konferencës për mediet, Malaj shpjegoi mënyrën se si do të aplikohet akciza e reduktuar në momentin që kemi një rritje të çmimit të karburanteve mbi nivelin 220 lekë të përcaktuar.

“Në momentin që Bordi i Transparencës do të caktojë që çmimi i tregtimit me pakicë do jetë 221 lekë, në këtë moment merret vendimi që çmimi i shitjes do jetë 221 lekë minus reduktimi i akcizë 20%, pra do të jetë 213 lekë. Kjo do bëhet në baza ditor. K ur çmimi kalon mbi 220 lekë, do kemi një reduktim të çmimit me pakicë me 8 lekë. Kur çmimi do jetë nën 220 lekë, do jetë çmimi që ka përcaktuar Bordi”, tha ministri.

Sa përket procesit të gjurmimit, Malaj theksoi se “kemi dy momente kryesore. Nëpërmjet kompanisë shtetërore ku do të vijohet me markimin e karburanteve që do të tregtohen në territorin e Shqipërisë. Cilësia e markimit do të jetë e niveleve më të larta në përputhje me kërkesat dhe standardet evropiane”.

“Ndërkohë që paralelisht me këtë edhe ato karburante që kalojnë tranzit, autobotet që bëjnë transportin e lëngut të djegshëm, do të modifikohen me pulla digjitale të cilat do të ndiqen në kohë reale nga momenti që ngarkesa hyn në territorin e Shqipërisë deri në momentin që del nga territori. Në momentin që ngarkesa del nga Shqipëria, këto elementë sigurie do të hiqen nga kamioni dhe vijon pastaj më tej në destinacionin final”, shpjegoi ministri i Financave.

Burimi ATSH