Edicioni i dytë i “Match-Maker Albania 2026”, eventi më i madh i vitit për biznesin, i organizuar nga Agjencia Shqiptare e Zhvillimit të Investimeve do të zhvillohet më 26 mars në Tiranë.

“MatchMaker Albania 2” është platforma më e madhe e biznesit dhe investimeve në vend, duke bashkuar në një ditë të vetme sipërmarrjen, institucionet dhe partnerët ndërkombëtarë.

Ministri i Turizmit, Kulturës dhe Sportit, Blendi Gonxhja tha se “është një kënaqësi e veçantë t’ju mirëpresim të gjithëve në edicionin e dytë të “Match Maker Albania”, një platformë që po konsolidohet me shpejtësi si një pikë referimi për nxitjen e partneriteteve, promovimin e investimeve dhe prezantimin e potencialit dinamik ekonomik të Shqipërisë”.

“Duke bashkuar bizneset, investitorët dhe institucionet, ky event krijon një hapësirë konkrete për bashkëpunim dhe zhvillim afatgjatë, me fokus në sektorët strategjikë”, tha Gonxhja.

Ministria e Turizmit, Kulturës dhe Sportit mbështet këtë nismë të rëndësishme, duke vlerësuar rolin e saj në forcimin e partneriteteve dhe zhvillimin e qëndrueshëm.

Kjo platformë e krijuar për të nxitur partneritete dhe bashkëpunim, është një mundësi e jashtëzakonshme për të lidhur eksportuesit shqiptarë me tregjet ndërkombëtare, për të prezantuar investimet vendase dhe të huaja në Shqipëri, për të shfaqur potencialin e vendit dhe për të krijuar bashkëpunime të reja me kompani botërore.

Burimi ATSH