Ministri i Mjedisit, Sofjan Jaupaj nënshkroi sot një marrëveshje bashkëpunimi me Universitetin Bujqësor të Tiranës përmes një Memorandumi Mirëkuptimi.

Sipas ministrit “partneriteti që ka ekzistuar prej kohësh në nivel teknik e akademik, tani merr formë të mirëstrukturuar dhe afatgjatë në shërbim të mbrojtjes së mjedisit dhe zhvillimit të qëndrueshëm”.

Jaupaj theksoi se “marrëveshja që nënshkruam së bashku me rektorin e UBT-së, prof. dr. Fatbardh Sallaku, përfshin fusha strategjike si menaxhimi i qëndrueshëm i burimeve natyrore, biodiversiteti, inxhinieria e pyjeve, rehabilitimi i mjediseve të ndotura, si dhe studimet për përshtatjen dhe zbutjen e ndryshimeve klimatike duke hapur gjithashtu mundësi për projekte të përbashkëta kërkimore, ekspertizë shkencore në mbështetje të politikave publike dhe praktika profesionale për studentët”.

“I bindur se ky partneritet mes Ministrisë së Mjedisit dhe UBT forcon lidhjen mes institucioneve publike dhe akademisë, duke e bërë shkencën një mbështetje konkrete për vendimmarrjen dhe duke përgatitur një brez të ri profesionistësh për sfidat mjedisore të së ardhmes, në një kohë kur Shqipëria avancon në procesin e integrimit evropian”, shkruan Jaupaj.