Delegacioni i përhershëm i Kuvendit në Asamblenë Parlamentare të OSBE-së, i përbërë nga deputetët Blendi Klosi dhe Fatmir Mediu, mori pjesë në punimet e sesionit të 33-të vjetor të Asamblesë Parlamentare të OSBE-së, zhvilluar nga 4 deri më 8 korrik 2026 në qendrën World Forum në Hagë, Holandë.

Sesioni u zhvillua nën temën “E drejta ndërkombëtare dhe parimet e përbashkëta: themelet për sigurinë dhe bashkëpunimin në hapësirën e OSBE-së”, duke mbledhur parlamentarë nga vendet pjesëmarrëse të Organizatës për Siguri dhe Bashkëpunim në Europë për të diskutuar sfidat aktuale të sigurisë, forcimin e bashkëpunimit ndërkombëtar dhe respektimin e së drejtës ndërkombëtare si bazë për paqen dhe stabilitetin.

Gjatë punimeve të sesionit, delegacioni shqiptar mori pjesë aktive në mbledhjet e tre komisioneve të përgjithshme dhe në sesionet plenare të Asamblesë, ku u trajtuan çështje të rëndësishme politike, ekonomike, të sigurisë, demokracisë dhe të drejtave të njeriut.

Në kuadër të aktivitetit u zhvilluan edhe zgjedhjet për drejtuesit e rinj të organeve të Asamblesë Parlamentare të OSBE-së, ku delegatët votuan për kryetarët e komisioneve kryesore dhe zëvendëspresidentët e rinj të këtij institucioni.

Një zhvillim i rëndësishëm për Shqipërinë ishte miratimi nga Asambleja Parlamentare e OSBE-së i propozimit të paraqitur nga delegacioni i Kuvendit të Shqipërisë për organizimin në vendin tonë të Sesionit të Vjeshtës të Asamblesë Parlamentare të OSBE-së në vitin 2027.

Ky vendim përbën një vlerësim të besimit të vendeve pjesëmarrëse ndaj Kuvendit të Shqipërisë dhe një mundësi të rëndësishme për forcimin e mëtejshëm të rolit të vendit në diplomacinë parlamentare ndërkombëtare, si dhe për promovimin e Shqipërisë si mikpritëse e forumeve të rëndësishme shumëpalëshe.

Pjesëmarrja e delegacionit shqiptar në këtë sesion konfirmon angazhimin e Kuvendit të Shqipërisë për të kontribuar në mënyrë aktive në punën e Asamblesë Parlamentare të OSBE-së, duke promovuar dialogun, bashkëpunimin dhe respektimin e parimeve themelore që garantojnë sigurinë dhe stabilitetin në hapësirën e OSBE-së.

Burimi ATSH