Në Fier ka nisur procesi i digjitalizimit të hartave kadastrale, një ndër projektet që synon modernizimin e sistemit kadastral dhe përmirësimin e cilësisë së shërbimeve për qytetarët.

Sipas njoftimit të Kadastrës Shqiptare, në total, 137 zona kadastrale do t’i nënshtrohen këtij procesi, sipas një kalendari të përcaktuar pune. Digjitalizimi përfshin inventarizimin e të gjitha planshetave fizike, skanimin e tyre, gjeoreferimin e materialeve hartografike, si dhe integrimin e të dhënave në sistemin digjital.

Kadastra njofton se “ky proces do të mundësojë akses më të shpejtë dhe më efikas në informacionin kadastral, duke lehtësuar trajtimin e shërbimeve dhe administrimin e pasurive të paluajtshme”.

“Gjatë zhvillimit të punimeve, sipas zonave kadastrale përkatëse, do të ketë një ndërprerje të përkohshme deri në 21 ditë për shërbimet që kërkojnë ndërhyrje në hartën kadastrale. Ndërkohë, aplikimet e tjera do të vijojnë të trajtohen normalisht”, thuhet në njoftim.

Autoritetet bëjnë të ditur se të gjitha aplikimet e depozituara gjatë kësaj periudhe, për të cilat nevojiten veprime në hartë, do të shqyrtohen dhe trajtohen menjëherë pas përfundimit të procesit të digjitalizimit në zonën përkatëse kadastrale.

Burimi ATSH