Kryetari i Kuvendit, Niko Peleshi priti sot në kryesinë e Kuvendit delegacionin e Komitetit të Përhershëm të Asamblesë Kombëtare Popullore të Republikës Popullore të Kinës, të kryesuar nga anëtari i Byrosë Politike të Komitetit Qendror të Partisë Komuniste, njëherazi edhe zëvendëskryetar i Komitetit të Përhershëm të Asamblesë Kombëtare Popullore të Republikës Popullore të Kinës, Li Hongzhong.

Gjatë takimit, bashkëbisedimi u përqendrua në marrëdhëniet tradicionale të miqësisë mes Shqipërisë dhe Republikës Popullore të Kinës, si edhe në forcimin e mëtejshëm të bashkëpunimit dypalësh në fusha me interes të përbashkët. Palët vlerësuan rëndësinë e rritjes së shkëmbimeve ekonomike, tregtare, arsimore, kulturore dhe rinore, si edhe zgjerimin e bashkëpunimit në sektorin e turizmit.

Zëvendëskryetari Hongzhong vlerësoi miqësinë e hershme mes vendeve tona, praninë e kulturës shqiptare në Republikën Popullore të Kinës, si edhe shprehu vullnetin për të zgjeruar marrëdhëniet miqësore dhe bashkëpunimin me Shqipërinë në fusha me interes të përbashkët.

Në fokus të diskutimeve ishte edhe intensifikimi i bashkëpunimit parlamentar mes Kuvendit të Shqipërisë dhe Asamblesë Kombëtare Popullore të Republikës Popullore të Kinës, përmes shkëmbimit të përvojave dhe forcimit të dialogut institucional.

Gjatë takimit u theksua gjithashtu rëndësia e kontributit të përbashkët të vendeve për ruajtjen e paqes, sigurisë dhe stabilitetit, në funksion të bashkëpunimit dhe zhvillimit rajonal e ndërkombëtar.

Burimi ATSH