Ministri i Punëve të Brendshme, Besfort Lamallari, bëri të ditur se sistemi i monitorimit të shkeljeve të rregullave të qarkullimit rrugore, do të kryhet përmes përdorimit të dronëve dhe mjeteve inteligjente.

Ai theksoi se kjo do të sigurojë zbatim e rregullave të qarkullimit rrugor, edhe kur pranë nuk janë patrullat policore.

“Mund të mos shihni policë në rrugë, por teknologjia është aty me dronë e mjete inteligjente që ndjekin çdo shkelje, në çdo aks, në çdo moment”, vuri në dukje ai.

“Syrit të pagabueshëm të teknologjisë nuk i shpëton dot askush që shkel pedalin e gazit përtej normave, ata që janë në timon nën efektin e alkoolit, të tjerë që përdorin edhe celularin apo ata që parkojnë vend e pavend”, theksoi ministri.

Pak ditë më parë, drejtori i Përgjithshëm i Policisë së Shtetit, Skënder Hita, kërkoi vëmendje të veçantë dhe angazhim nga të gjithë drejtuesit dhe efektivët, me qëllim rritjen e parametrave të sigurisë rrugore dhe parandalimin e çdo akti abuziv në terren.

“Të mos ndalohen më automjetet në akset rrugore nacionale, pa shkak, por të përdoret teknologjia, poliskani, mjetet shpejtësimatëse dhe dronët, pasi teknologjia është e ardhmja. Masat administrative të prodhuara nga këto mjete duhet të hidhen në sistem brenda ditës”, tha ai.

Gjithashtu, Hita kërkoi kontroll rigoroz me grupe pune dhe plane masash në qendrat urbane, për parkimet e gabuara, manovrat e gabuara, zhurmat e gjeneruara nga marmitat e modifikuara, drejtimin e mjetit në efektin e alkoolit apo në gjendje të dehur dhe për çdo shkelje që sjell trafik dhe rrezik për sigurinë e jetës së përdoruesve të rrugës.

Marrë nga ATSH