Guvernatori i Bankës së Shqipërisë, Gent Sejko, po merr pjesë në mbledhjet e pranverës të Fondit Monetar Ndërkombëtar dhe Bankës Botërore, që zhvillohet në datat 16–19 prill 2026 në Uashington DC, SHBA.

Këto mbledhje përbëjnë një nga forumet më të rëndësishme ekonomike ndërkombëtare, ku marrin pjesë vendimmarrës të lartë të institucioneve financiare globale, guvernatorë të bankave qendrore dhe ministra të financave nga vendet anëtare, me fokus zhvillimet më të fundit të ekonomisë botërore dhe sfidat e qëndrueshmërisë financiare.

Delegacioni i Bankës së Shqipërisë, i kryesuar nga Guvernatori Sejko, përfshin gjithashtu zëvendësguvernatoren e Parë, Holta Zaçaj, si dhe drejtues të tjerë të lartë të institucionit.

Gjatë vizitës, Guvernatori Sejko do të zhvillojë takime me përfaqësues të Fondit Monetar Ndërkombëtar dhe Bankës Botërore, si edhe me homologë të bankave qendrore, ku do të prezantojë ecurinë e ekonomisë shqiptare, reformat e ndërmarra dhe perspektivat për stabilitetin monetar e financiar të vendit.

Pjesëmarrja në këtë forum konfirmon angazhimin e Bankës së Shqipërisë për politika të qëndrueshme ekonomike dhe forcimin e bashkëpunimit me institucionet financiare ndërkombëtare në funksion të zhvillimit të mëtejshëm të vendit.

Marrë nga ATSH