Rrugët e kalldrëmta të qytetit historik të Krujës, edhe këtë vit janë të mbushura me turistë të huaj, por edhe pushues vendas.

Pazari karakteristik i këtij qyteti, mbetet një prej atraksioneve më të frekuentuara, duke nxitur kureshtjen e të huajve që të njihen me historinë dhe artizanatin e këtij qyteti, por ndërkohë qyteti ofron edhe peizazhe natyrore dhe perëndime dielli si askund.

Ministri i Turizmit, Kulturës dhe Sportit, Blendi Gonxhja ndau sot në rrjetet sociale, pamje nga Pazari i Krujës, plot me turistë nga e gjithë bota.

Nga Pazari i Krujës, te Muzeu Kombëtar “Gjergj Kastrioti Skënderbeu” dhe Muzeu Etnografik, ky qytet vijon të mbetet ndër qytetet më të vizituara. Rrugët gumëzhijnë nga turistët vendas e të huaj, që zbulojnë historinë, artizanatin dhe bukuritë e qytetit.

Kruja njihet për turizmin historik njëditor, por me shtimin e strukturave akomoduese turistët po qëndrojnë më gjatë në këtë qytet historik.

Pazari karakteristik i Krujës me rrugicat e ngushta me kalldrëm, ku ofrohen punime artizanale tradicionale është një ndër të preferuarit e turistëve. Por turistët nuk ikin nga Kruja pa vizituar edhe Muzeun Kombëtar “Gjergj Kastrioti Skënderbeu” dhe Muzeun Etnografik Krujë.

Burimi ATSH