Qendra e Autizmit në Elbasan është një strukturë e dedikuar në mbështetje të zhvillimit dhe mirëqenies së fëmijëve me çrregullime të spektrit të autizmit.

Ministria e Shëndetësisë dhe Mirëqenies Sociale informoi sot se kjo qendër, përmes një ekipi profesionistësh multidisiplinar ofron shërbime të specializuara si psikoterapi, fizioterapi dhe logopedi për këtë kategori fëmijësh.

Iris Zyrakja, përgjegjëse e qendrës së autizmit në Elbasan shprehet se kjo strukturë funksionon prej gati 15 vitesh dhe është pjesë e këshillit të qarkut të këtij qyteti, ndërsa financiarisht varet nga Ministria e Shëndetësisë.

“Qendra ofron shërbime të shumta për sa i përket fëmijëve të spektrit autik. Grupi multidisiplinar që përbëhet nga një psikolog, punonjës social, fizioterapist dhe një terapist, i pajis prindërit me një vlerësim fillestar, ndërsa më pas shoqërohen te neuropediatri”, tha Zyrakja.

Ndërsa, Parashqevi Projkja, psikologe e kësaj qendre nënvizoi se çdo ditë në këtë strukturë operohet me trajtimin e pesë fëmijëve.

“Nga e hëna në të enjte ne ofrojmë terapi zhvillimi ABA. Secili nga fëmijët është i pajisur me një plan individual pay. Plani pay hartohet nga psikologu qendrës me një ekip multidisiplinar në bashkëpunim me prindërit dhe vihet në dispozicion të tyre”, tha ajo.

Gjithashtu, Luljeta prindi i një fëmije me çrregullim të spektrit autik shprehet se prej dy vitesh ndjek vajzën në këtë qendër.

“Falë punës së përkushtuar të stafit, i gjithë procesi i terapisë ka ndikuar shumë pozitivisht te vajza. Sapo ajo mbaron terapinë ne marrim propozime se si të punojmë në shtëpi me fëmijën”, pohoi ajo.

Burimi ATSH