Pasditen e së premtes, presidenti kinez Xi Jinping, gjithashtu sekretar i përgjithshëm i Komitetit Qendror të Partisë Komuniste të Kinës dhe kryetar i Komisionit Qendror Ushtarak, vizitoi anëtarët e Partisë Demokratike të Fermerëve e Punëtorëve dhe Shoqatës “Jiusan”, sektorit mjekësor e shëndetësor, si edhe sektorit të mirëqenies dhe sigurimeve shoqërore, të cilët marrin pjesë në sesionin e katërt të Komitetit të 14-të Kombëtar të Konferencës Konsultative Politike të Popullit Kinez (KKPPK). Ai mori pjesë gjithashtu në një mbledhje të përbashkët në grup për të dëgjuar mendimet dhe sugjerimet e tyre, duke theksuar që ndërtimi i një Kine të shëndetshme deri në vitin 2035 është një vendim strategjik, dhe periudha e Planit të 15-të Pesëvjeçar është një periudhë vendimtare për arritjen e këtij qëllimi, që kërkon planifikim gjithëpërfshirës dhe zbatim të përshpejtuar.

Në mbledhjen e përbashkët në grup, gjashtë anëtarë folën mbi tema të tilla si zbatimi i strategjisë së zhvillimit të shëndetit me përparësi, përmirësimi i nivelit të shërbimeve të kujdesit shëndetësor parësor, promovimi i kërkimit dhe zhvillimit inovativ të barnave, parandalimi dhe kontrolli i sëmundjeve të lartësisë dhe zhvillimi i mirëqenies publike dhe bamirësisë.

Pasi dëgjoi fjalën e tyre, Xi Jinping-u mbajti një fjalim. Ai shprehu kënaqësinë e tij për diskutimet dhe dëgjimin e mendimeve dhe sugjerimeve të tyre. Në emër të Komitetit Qendror të PKK-së, ai u përcolli përshëndetje të sinqerta të gjithë anëtarëve të pranishëm, anëtarëve të Partisë Demokratike të Fermerëve e Punëtorëve dhe Shoqatës “Jiusan”, si edhe përfaqësuesve të sektorit të mjekësisë e shëndetësisë dhe sektorit të mirëqenies sociale e sigurimeve shoqërore.

Foto nga Xinhua

Xi Jinping-u theksoi se gjatë vitit të kaluar, Konferenca Konsultative Politike e Popullit Kinez (KKPPK) ofroi sugjerime e këshilla lidhur me hartimin e Planit të 15-të Pesëvjeçar, duke dhënë kontribute të reja në zhvillimin e Partisë dhe të vendit. Anëtarët e Partisë Demokratike të Fermerëve e Punëtorëve dhe Shoqatës “Jiusan” morën pjesë aktive në konsultimet politike dhe kryen shërbime shoqërore. Punonjësit nga sektorët e mjekësisë dhe të shëndetësisë, si edhe të mirëqenies sociale dhe sigurimeve shoqërore, iu përkushtuan praktikës së ndërtimit të një Kine të shëndetshme dhe përmirësimit të mirëqenies së njerëzve, duke demonstruar arritje të reja.

Xi u shpreh më tej se Kina është një vend në zhvillim me një popullsi të madhe, dhe hendeku midis zonave dhe rajoneve urbane e rurale mbetet i ndjeshëm. Ndërtimi i një Kine të shëndetshme kërkon respektimin e kushteve kombëtare, ndjekjen e palëkundur të rrugës së zhvillimit të shëndetit dhe mirëqenies me karakteristika kineze, dhe zbatimin e udhëzimeve të punës për shëndetin dhe mirëqenien për epokën e re.

Sipas tij, ndërtimi i një Kine të shëndetshme është një projekt sistematik. “Përballë nevojave në rritje të njerëzve për shëndet e mirëqenie, ne duhet të përqendrohemi në fushat kryesore, duke përqendruar përpjekjet tona në përmirësimin e sistemit të shëndetit publik, ndërtimin e një sistemi shërbimesh mjekësore me cilësi të lartë e efikase, dhe nxitjen e stilit të shëndetshëm të jetesës për të arritur rezultate të reja,” vuri në dukje kreu i shtetit kinez.

Xi theksoi më tej nevojën për të përmirësuar modelin e punës së udhëheqjes së unifikuar nga Komiteti i Partisë dhe menaxhimin e përbashkët nga Partia dhe qeveria, si edhe për të përmirësuar sistemin e politikave të promovimit të shëndetit për të ofruar garanci për ndërtimin e një Kine të shëndetshme. “Ne duhet të thellojmë më tej reformat, të përmirësojmë mekanizmin për zhvillimin e koordinuar të kujdesit mjekësor, sigurimeve shëndetësore dhe farmaceutikës, të promovojmë transformimin e arritjeve shkencore e teknologjike dhe të përparojmë digjitalizimin e shëndetësisë kombëtare,” shtoi ai.

Foto nga Xinhua

Xi tha po ashtu se ndërtimi i një Kine të shëndetshme kërkon përpjekjet e përbashkëta të të gjithë shoqërisë. KKPPK-ja duhet të luajë rolin e vet si një organ këshillimor, të kryejë kërkime të thella mbi çështjet përkatëse dhe të paraqesë sugjerime praktike. Anëtarët e Partisë Demokratike të Fermerëve e Punëtorëve dhe Shoqatës “Jiusan” si edhe punonjësit nga sektorët e mjekësisë e shëndetësisë dhe mirëqenies sociale e sigurimeve shoqërore, duhet të shfrytëzojnë epërsitë e tyre profesionale dhe të kontribuojnë në mënyrë aktive me mençurinë dhe forcën e tyre.
Burimi CGTN