Ministri i Mbrojtjes, Pirro Vengu, mori pjesë në ceremoninë e 5-vjetorit të krijimit të Regjimentit të Operacioneve Speciale, duke vlerësuar rolin e këtij formacioni elitë në forcimin e kapaciteteve mbrojtëse të vendit.

Në fjalën e tij, Vengu theksoi se historia ka treguar se për një shtet të vogël, cilësia është elementi që garanton forcën dhe mbijetesën.

“Ka momente në histori kur kombet kuptojnë një të vërtetë të thjeshtë: sasia është e domosdoshme, por është cilësia ajo që garanton forcën. Edhe Regjimenti juaj është ndërtuar mbi këtë parim: jo kushdo hyn dhe jo kushdo udhëheq. Sepse një shtet i vogël nuk ka luksin e papërgatitjes. Ai mbijeton vetëm kur më të mirët janë në krye”, u shpreh ministri.

Vengu iu referua edhe 2 marsit 1444 në Lezhë, kur princat shqiptarë u bashkuan nën udhëheqjen e heroit kombëtar Gjergj Kastrioti Skënderbeu, duke e cilësuar atë si një aleancë cilësie dhe vizioni për mbrojtjen e vendit dhe dinjitetit të shqiptarëve.

Sipas tij, përzgjedhja në forcat speciale nuk është thjesht një proces administrativ, por një garanci për standard, meritë dhe lidership të drejtë, ndërsa theksoi se Regjimenti duhet të mbetet një laborator standardesh për të gjithë Forcat e Armatosura.

Ministri falënderoi efektivët dhe familjet e tyre për sakrificën dhe përkushtimin, si edhe drejtuesit e strukturave ushtarake për angazhimin në rritjen e kapaciteteve operacionale.

Nga ana e tij, shefi i Shtabit të Përgjithshëm të Forcave të Armatosura, Arben Kingji, u shpreh se ky përvjetor përfaqëson jo vetëm një moment simbolik, por edhe një standard të arritur.

Marrë nga ATSH