Në kushtet e përshkallëzimit të situatës së sigurisë në Lindjen e Mesme, Kryeministri Edi Rama zhvilloi sot një komunikim me ambasadorët e Republikës së Shqipërisë për të gjithë angazhimin e rrjetit diplomatik shqiptar për garantimin e sigurisë së shtetasve shqiptarë në vendet e prekura, komunikimit të vazhdueshëm me bashkatdhetarët shqiptarë që gjenden në këto vende, për menaxhimin e kërkesave dhe nevojave të tyre.

Ministri i propozuar për Europën dhe Punët e Jashtme, Ferit Hoxha, deklaroi se duhen mbajtur kontaktet me qytetarët shqiptarë në këtë rajon.

“E mira është që të mbajmë kontakt, t’i kemi të regjistruar të gjithë. Të kenë mundësi të kenë kontakt në çdo orë me ambasadën, sepse ne do të jemi ata që do t’i ndihmojmë, dhe shërbimi publik shqiptar jo vetëm është në krye të detyrës, por është absolutisht në më të mirën e vet çdo moment kur ka nevojë për të ndihmuar shtetasit tanë”, tha Hoxha.

Kryeministri Rama vlerësoi gatishmërinë e ekipit diplomatik duke theksuar se nevojitet informacion në kohë reale.

“Për çdo gjë me këtë ekip që keni të koordinuar, besoj që ne do të jemi të informuar në kohë reale. Ju falënderoj për këtë prani!”, tha Rama.

Qeveria po monitoron situatën në vendet e përfshira nga konflikti dhe ka vendosur mekanizma për të garantuar mbështetje dhe informacion të shpejtë për qytetarët shqiptarë në nevojë.

Burimi ATSH