Në ditën simbolike të 17 Shkurtit, Ditës së Pavarësisë së Kosovës, nxënës në shkolla të ndryshme të vendit u angazhuan në projekte ku bashkohen vlerat më të bukura kombëtare.

Kryeministri Edi Rama publikoi në rrjetet sociale, foto të nxënësve të shkollave tona që sot festuan me zemër dhe plot krenari, lirinë e pavarësinë e Kosovës.

Rama tha se kjo është një “ditë na bashkon në vlerat më të bukura kombëtare, ndërsa nderojmë të kaluarën dhe projektojmë një të ardhme që na frymëzon me dashurinë për atdheun”.

Nxënësit e shkollave kanë realizuar projekte të ndryshme përmes vizatimeve me simbolet e Shqipërisë dhe Kosovës, veshjeve, flamujve etj.

17 shkurti i këtij viti shënon 18 vjet nga shpallja e Pavarësisë së Kosovës.

Kjo datë e vitit 2008 shënoi fundin e rrugëtimit të gjatë e të vështirë të Kosovës për shtetësi, si dhe fillimin e proceseve të tjera të rëndësishme për shtetin më të ri në botë.

Dita e Pavarësisë së Kosovës na kujton rrugëtimin e gjatë drejt lirisë, sfidat e përballuara me guxim dhe vendosmërinë e një populli që kurrë nuk reshti së besuari tek e drejta e tij për shtet e dinjitet.

Burimi ATSH