Në kuadër të Javës së Internetit të Sigurt, Policia e Shtetit, nëpërmjet Drejtorisë së Hetimit të Krimit Kibernetik, përcolli sot një apel për të miturit, prindërit dhe kujdestarët.

Sipas policisë, nga të dhënat e përfituara nëpërmjet bashkëpunimit me NCMEC (National Center for Missing & Exploited Children – Qendra Kombëtare për Fëmijët e Zhdukur dhe të Shfrytëzuar), një organizatë amerikane që bashkëpunon me agjencitë ligjzbatuese në mbarë botën, për identifikimin dhe raportimin e materialeve me përmbajtje të shfrytëzimit seksual të të miturve në internet, rezulton një rritje shqetësuese e rasteve të raportuara.

“Gjatë vitit 2025, Policia e Shtetit ka marrë 5 707 raporte të referuara nga NCMEC, që përkthehet në një mesatare prej rreth 475 raportesh në muaj. Ndërkaq, vetëm gjatë muajit janar të vitit 2026 janë administruar 655 raporte, duke treguar një rritje të ndjeshme të fenomenit”, thuhet në njoftim.

Në këtë kuadër, Policia e Shtetit apelon për prindërit që të monitorojnë dhe të jenë të vëmendshëm ndaj aktivitetit online të fëmijëve të tyre, të komunikojnë hapur me ta, mbi rreziqet e internetit dhe rëndësinë e mbrojtjes së të dhënave personale dhe të përdorin mjete kontrolli dhe masa sigurie në pajisjet elektronike.

Policia e Shtetit apelon që prindërit dhe çdo qytetar të ruajë privatësinë dhe intimitetin e fëmijëve të mitur, duke mos shpërndarë apo ripostuar materiale të papërshtatshme. Këto përmbajtje identifikohen nga NCMEC, përmes teknologjive të specializuara, dhe të dhënat e poseduesve apo të shpërndarësve të tyre, i referohen Policisë së Shtetit, për ndjekje të mëtejshme ligjore.

Në fund, Policia thekson se “mbrojtja e fëmijëve në hapësirën digjitale është përgjegjësi e përbashkët. Vetëm nëpërmjet bashkëpunimit ndërmjet institucioneve, prindërve dhe komunitetit, mund të garantojmë një përdorim më të sigurt të internetit, për çdo fëmijë”.

Burimi ATSH